โส มงฺคลโทสวีติวตฺโต

ยุคโยคาธิคโต น ชาตุเมตีติ ฯ

ตตฺถ ยสฺส มงฺคลา สมูหตาติ ยสฺส อรหโต ขีณาสวสฺส ทิฏฺฐมงฺคลํ สุตมงฺคลํ มุตมงฺคลนฺติ เอเต มงฺคลา สมุจฺฉินฺนา ฯ อุปฺปาตา สุปินา จ ลกฺขณา จาติ เอวรูโป จนฺทคฺคาโห ภวิสฺสติ เอวรูโป สุริยคฺคาโห ภวิสฺสติ เอวรูโป นกฺขตฺตคฺคาโห ภวิสฺสติ เอวรูโป อุกฺกาปาโต ภวิสฺสติ เอวรูโป ทิสาทาโห ภวิสฺสตีติ อิเม ปญฺจ มหาอุปฺปาตา นานปฺปการา จ สุปินาปิ สุภคลกฺขณํ ทุพฺภคลกฺขณํ อิตฺถีลกฺขณํ ปุริสลกฺขณํ ทาสลกฺขณํ ทาสีลกฺขณํ อสิลกฺขณํ อุสุลกฺขณํ อาวุธลกฺขณํ วตฺถลกฺขณนฺติ เอวมาทิกานิ ลกฺขณานิ อิเม จ ทิฏฺฐิฏฺฐานา ยสฺส สมูหตา น เอเตหิ อุปฺปาตาทีหิ อตฺตโน มงฺคลํ วา อวมงฺคลํ วา ปจฺเจติ ฯ โส มงฺคลโทสวีติวตฺโตติ โส ขีณาสโว สพฺพมงฺคลโทเส วีติวตฺโต อติกฺกนฺโต ปชหิตฺวา ฐิโต ฯ ยุคโยคาธิคโต น ชาตุเมตีติ โกโธ จ อุปนาโห จ มกฺโข จ ปฬาโส จาติ อาทินา นเยน เทฺว เทฺว เอกโต อาคตกฺกิเลสา ยุคา นาม ฯ กามโยโค ภวโยโค ทิฏฺฐิโยโค อวิชฺชาโยโคติ อิเม สํสาเร โยชนภาวโต จตฺตาโร โยคา นาม ฯ เต ยุเค จ โยเค จาติ ยุคโยเค อธิคโต อภิภวิตฺวา คโต วีติวตฺโต สมติกฺกนฺโต ขีณาสโว ภิกฺขุ ฯ น ชาตุเมตีติ ปุน ปฏิสนฺธิวเสน เอกํเสเนว อิมํ โลกํ น เอติ นาคจฺฉติ ฯ

เอวํ สตฺถา อิมาย คาถาย พฺราหฺมณสฺส ธมฺมํ เทเสตฺวา ปุน สจฺจานิ ปกาเสสิ ฯ สจฺจปริโยสาเน พฺราหฺมโณ สทฺธึ ปุตฺเตน โสตาปตฺติผเล ปติฏฺฐหิ ฯ สตฺถา ชาตกํ สโมธาเนสิ ตทา เอเตว ปิตาปุตฺตา อเหสุํ ตาปโส ปน อหเมวาติ ฯ