ตตฺถ กลฺยาณเมว มุญฺเจยฺยาติ จตุทฺโทสวินิมุตฺตํ กลฺยาณํ สุนฺทรํ อนวชฺชเมว มุญฺเจยฺย วิสฺสชฺเชยฺย กเถยฺย ฯ น หิ มุญฺเจยฺย ปาปิกนฺติ ปาปิกํ ลามกํ ปเรสํ อปฺปิยํ อมนาปํ น มุญฺเจยฺย ฯ โมกฺโข กลฺยาณิยา สาธูติ กลฺยาณวาจาย วิสฺสชฺชนเมว อิมสฺมึ โลเก สาธุ สุนฺทรํ ภทฺทกํ ฯ มุตฺวา ตปติ ปาปิกนฺติ ปาปิกํ ผรุสวาจํ มุญฺจิตฺวา วิสฺสชฺเชตฺวา กเถตฺวา โส ปุคฺคโล ตปติ โสจติ กิลมตีติ ฯ

เอวํ สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา พฺราหฺมโณ อานนฺโท อโหสิ พฺราหฺมณี อุปฺปลวณฺณา สารมฺโภ ปน อหเมวาติ ฯ

สารมฺภชาตกํ อฏฺฐมํ ฯ