๑๐. อกตญฺญูชาตกํ

โย ปุพฺเพ กตกลฺยาโณติ อิทํ สตฺถา เชตวเน วิหรนฺโต อนาถปิณฺฑิกํ อารพฺภ กเถสิ ฯ

ตสฺส กิเรโก ปจฺจนฺตวาสิโก เสฏฺฐี อทิฏฺฐสหาโย อโหสิ ฯ โส เอกทา ปจฺจนฺเต อุฏฺฐานกภณฺฑสฺส ปญฺจ สกฏสตานิ ปูเรตฺวา กมฺมิเก มนุสฺเส อาห คจฺฉถ โภ อิมํ ภณฺฑํ สาวตฺถึ เนตฺวา อมฺหากํ สหายสฺส อนาถปิณฺฑิกสฺส มหาเสฏฺฐิสฺส ปจฺจคฺเฆน วิกฺกิณิตฺวา ปฏิภณฺฑํ อาหรถาติ ฯ เต สาธูติ ตสฺส วจนํ สมฺปฏิจฺฉิตฺวา สาวตฺถึ คนฺตฺวา มหาเสฏฺฐึ ทิสฺวา ปณฺณาการํ ทตฺวา ตํ ปวุตฺตึ อาโรจยึสุ ฯ มหาเสฏฺฐีปิ ทิสฺวา สฺวาคตํ โวติ เตสํ นิวาสญฺจ ปริพฺพยญฺจ ทาเปตฺวา สหายสฺส สุขํ ปุจฺฉิตฺวา ภณฺฑํ วิกฺกิณิตฺวา ปฏิภณฺฑํ ทาเปสิ ฯ เต ปจฺจนฺตํ คนฺตฺวา ตมตฺถํ อตฺตโน เสฏฺฐิสฺส อาโรเจสุํ ฯ อปรภาเค อนาถปิณฺฑิโกปิ ตเถว ปญฺจ สกฏสตานิ ตตฺถ เปเสสิ ฯ มนุสฺสา ตตฺถ คนฺตฺวา ปณฺณาการํ อาทาย ปจฺจนฺตวาสิกเสฏฺฐึ ปสฺสึสุ ฯ โส กุโต อาคจฺฉถาติ ปุจฺฉิตฺวา สาวตฺถิโต ตุมฺหากํ สหายกสฺส อนาถปิณฺฑิกสฺส สนฺติกาติ วุตฺเต อนาถปิณฺฑิโกติ กสฺสจิ ปุริสสฺส นามํ ภวิสฺสตีติ ปริหาสํ กตฺวา ปณฺณาการํ คเหตฺวา คจฺฉถ ตุมฺเหติ อุยฺโยเชสิ เนว นิวาสํ น ปริพฺพยํ ทาเปสิ ฯ เต สยเมว ภณฺฑํ วิกฺกิณิตฺวา ปฏิภณฺฑํ อาทาย สาวตฺถึ อาคนฺตฺวา เสฏฺฐิสฺส ตํ ปวุตฺตึ อาโรเจสุํ ฯ อถ โส ปจฺจนฺตวาสี ปุนปิ เอกวารํ ตเถว ปญฺจ สกฏสตานิ สาวตฺถึ เปเสสิ ฯ มนุสฺสา ปณฺณาการํ อาทาย มหาเสฏฺฐึ ปสฺสึสุ ฯ เต ปน ทิสฺวา อนาถปิณฺฑิกสฺส มนุสฺสา มยํ สามิ เอเตสํ นิวาสญฺจ ภตฺตญฺจ ปริพฺพยญฺจ ชานิสฺสามาติ วตฺวา เตสํ สกฏานิ พหินคเร ตถารูเป ฐาเน โมจาเปตฺวา ตุมฺเห อิธ วสถ อมฺหากํ โว ฆเร ยาคุภตฺตญฺจ ปริพฺพโย จ ภวิสฺสตีติ คนฺตฺวา ทาสกมฺมกเร สนฺนิปาเตตฺวา มชฺฌิมยามสมนนฺตเร ปญฺจ สกฏสตานิ วิลุมฺปิตฺวา นิวาสนปารุปนานิปิ เตสํ อจฺฉินฺทิตฺวา โคเณ ปลาเปตฺวา ปญฺจ สกฏสตานิ วิจกฺกานิ กตฺวา ภูมิยํ ฐเปตฺวาว จกฺกานิปิ คณฺหิตฺวา อคมํสุ ฯ ปจฺจนฺตวาสิโน นิวาสนมตฺตสฺสาปิ สามิกา อหุตฺวา ภีตา เวเคน ปลายิตฺวา ปจฺจนฺตเมว คตา ฯ เสฏฺฐิมนุสฺสาปิ ตํ ปวุตฺตึ มหาเสฏฺฐิโน อาโรเจสุํ ฯ โส อตฺถิทานิ กถาปาภตนฺติ สตฺถุ สนฺติกํ คนฺตฺวา อาทิโต ปฏฺฐาย สพฺพํ ปวุตฺตึ อาโรเจสิ ฯ สตฺถา น โข คหปติ โส ปจฺจนฺตวาสี อิทาเนว เอวํสีโล ปุพฺเพปิ เอวํสีโลเยว อโหสีติ วตฺวา เตน ยาจิโต อตีตํ อาหริ ฯ