เยปิ อสญฺญิโน เตปิ ทุคฺคตา

เอตํ อุภยํ วิวชฺชย

ตํ สมาปตฺติสุขํ อนงฺคณนฺติ ฯ

ตตฺถ เย สญฺญิโนติ ฐเปตฺวา เนวสญฺญานาสญฺญายตนลาภิโน อวเสเส สจิตฺตกสตฺเต ทสฺเสติ ฯ เตปิ ทุคฺคตาติ ตสฺสา สมาปตฺติยา อลาภโต เตปิ ทุคฺคตา นาม ฯ เยปิ อสญฺญิโนติ อสญฺญิภเว นิพฺพตฺเต อจิตฺตกสตฺเต ทสฺเสติ ฯ เตปิ ทุคฺคตาติ เตปิ อิมิสฺสาเยว สมาปตฺติยา อลาภโต ทุคฺคตาเยว นาม ฯ เอตํ อุภยํ วิวชฺชยาติ เอตํ อุภยมฺปิ สญฺญิภาวญฺจ อสญฺญิภาวญฺจ วิวชฺชย ปชหาติ อนฺเตวาสิกํ โอวทติ ฯ ตํ สมาปตฺติสุขํ อนงฺคณนฺติ ตํ เนวสญฺญานาสญฺญายตนสมาปตฺติลาภิโน สนฺตสนฺเตน สุขนฺติ สงฺขํ คตํ ฌานสุขํ อนงฺคณํ นิทฺโทสํ พลวจิตฺเตกคฺคตาสภาเวนปิ ตํ อนงฺคณํ นาม ชาตํ ฯ