สนฺตปฺปิโต สปฺปินา ปายาเสน

กิจฺฉา กตํ ปณฺณกุฏึ อทฑฺฑหีติ ฯ

ตตฺถ น สนฺถวสฺมาติ ตณฺหาสนฺถวาปิ มิตฺตสนฺถวาปิ ทุวิธาปิ เอตสฺมา สนฺถวา ปรํ อุตฺตรึ อญฺญํ ปาปตรํ ลามกตรํ นาม นตฺถีติ อตฺโถ ฯ โย สนฺถโว กาปุริเสนาติ โย ปาปเกน กาปุริเสน สทฺธึ ทุวิโธปิ เอส สนฺถโว ตโต ปาปตรํ อญฺญํ นตฺถิ ฯ กสฺมา ฯ สนฺตปฺปิโต อทฑฺฑหีติ ยสฺมา สปฺปินา จ ปายาเสน จ สนฺตปฺปิโตปิ อยํ อคฺคิ มยา กิจฺเฉน กตํ ปณฺณสาลํ ฌาเปสีติ อตฺโถ ฯ

โส เอวํ วตฺวา น เม มิตฺตทุพฺภินา อตฺโถติ ตํ อคฺคึ อุทเกน นิพฺพาเปตฺวา สาขาหิ โปเถตฺวา อนฺโตหิมวนฺตํ ปวิสิตฺวา เอกํ สามํ นาม มิคึ สีหสฺส จ พฺยคฺฆสฺส จ ทีปิโน จ มุขํ เลหนฺตึ ทิสฺวา สปฺปุริเสหิ สทฺธึ สนฺถวา ปรํ เสยฺโย นาม นตฺถีติ จินฺเตตฺวา ทุติยํ คาถมาห