4 Dubbhiyamakkaṭajātakaṃ

adammi te vāri bahuttarūpanti idaṃ satthā veḷuvane viharanto devadattaṃ ārabbha kathesi.

Ekasmiṃ hi divase dhammasabhāyaṃ bhikkhū devadattassa akataññutaṃ mittadubbhibhāvaṃ kathentā nisīdiṃsu. Satthā na bhikkhave devadatto idāneva akataññū mittadubbhi pubbepi evarūpo ahosīti vatvā atītaṃ āhari.

Atīte bārāṇasiyaṃ brahmadatte rajjaṃ kārente bodhisatto ekasmiṃ kāsikagāmake brāhmaṇakule nibbattitvā vayappatto gharāvāsaṃ saṇṭhapesi. Tasmiṃ pana samaye kāsikaraṭṭhe vattanimahāmagge eko gambhīro udakapāno ahosi anotaraṇīyo tiracchānānaṃ. Maggapaṭipannā puññatthikā manussā dīgharajjukena vārakena udakaṃ ussiñcitvā ekissā doṇiyā pūretvā tiracchānānaṃ pānīyaṃ denti. Tassa samantato mahantaṃ araññaṃ. Tattha bahū makkaṭā vasanti. Atha Tasmiṃ magge dve tīṇi divasāni manussānaṃ sañcāro pacchijji. Tiracchānā pānīyaṃ na labhiṃsu. Eko makkaṭo pipāsāturo pānīyaṃ pariyesanto udakapānassa santike vicarati. Bodhisatto kenacideva karaṇīyena taṃ maggaṃ paṭipajjitvā gacchanto tattha pānīyaṃ ussiñcitvā pivitvā hatthapāde dhovitvā ṭhito taṃ makkaṭaṃ addasa. Athassa pipāsitabhāvaṃ ñatvā pānīyaṃ ussiñcitvā doṇiyaṃ ākiritvā adāsi. Datvā ca pana vissamissāmīti ekasmiṃ rukkhamūle nipajji. Makkaṭo pānīyaṃ pivitvā avidūre nisīditvā mukhamakkaṭikaṃ karonto bodhisattaṃ bhiṃsāpeti. Bodhisatto tassa kiriyaṃ disvā are duṭṭhamakkaṭa ahaṃ tava pipāsitassa kilantassa bahuṃ pānīyaṃ adāsiṃ, idāni tvaṃ mayhaṃ mukhamakkaṭikaṃ karosi, aho pāpajanassa nāma kato upakāro niratthakoti vatvā paṭhamaṃ gāthamāha