8 Kiṃsukopamajātakaṃ

sabbehi kiṃsuko diṭṭhoti idaṃ satthā jetavane viharanto kiṃsukopamasuttantaṃ ārabbha kathesi.

Cattāro kira bhikkhū tathāgataṃ upasaṅkamitvā kammaṭṭhānaṃ yāciṃsu. Satthā tesaṃ kammaṭṭhānaṃ kathesi. Te kammaṭṭhānāni gahetvā attano rattiṭṭhānadivāṭṭhānāni agamaṃsu. Tesu eko cha phassāyatanāni pariggaṇhitvā arahattaṃ pāpuṇi. Eko pañcakkhandhe. Eko cattāro mahābhūte. Eko aṭṭhārasadhātuyo. Te attano attano adhigatavisesaṃ satthu ārocesuṃ. Tatthekassa bhikkhuno parivitakko udapādi imesaṃ kammaṭṭhānānaṃ nānā, nibbānaṃ pana ekaṃ, kathaṃ sabbehi arahattaṃ pattanti. So satthāraṃ pucchi. Satthā kinte bhikkhu kiṃsukadiṭṭhehi catūhi bhātikehi nānattanti vatvā idaṃ no bhante kāraṇaṃ kathethāti bhikkhūhi yācito atītaṃ āhari.

Atīte bārāṇasiyaṃ brahmadatto rajjaṃ kāresi. Tassa cattāro puttā ahesuṃ. Te ekadivasaṃ sārathiṃ pakkosāpetvā mayaṃ samma kiṃsukaṃ daṭṭhukāmā, kiṃsukarukkhaṃ no dassehīti āhaṃsu. Sārathi sādhu dassessāmīti vatvā catunnaṃ ekato adassetvā jeṭṭhaputtaṃ tāva rathe nisīdāpetvā araññaṃ netvā ayaṃ kiṃsukoti khāṇukakāle kiṃsukaṃ dassesi. Aparassa bālapalāsakāle, aparassa pupphitakāle, aparassa phalitakāle. Aparabhāge cattāropi bhātaro ekato nisinnā kiṃsuko