cammasāṭakajātakaṃ

kalyāṇarūpo vatāyanti idaṃ satthā jetavane viharanto cammasāṭakaṃ nāma paribbājakaṃ ārabbha kathesi.

Tassa kira cammameva nivāsanañca pārupanañca. So ekadivasaṃ paribbājakārāmā nikkhamitvā sāvatthiyaṃ bhikkhāya caranto eḷakānaṃ yujjhanaṭṭhānaṃ sampāpuṇi. Eḷako taṃ disvā paharitukāmo osakki. Paribbājako esamhaṃ apacitiṃ dassetīti na paṭikkami. Eḷako vegena āgantvā taṃ ūrumhi paharitvā pātesi. Tassa taṃ asantassa paggahaṇakāraṇaṃ bhikkhusaṅghe pākaṭaṃ ahosi. Bhikkhū dhammasabhāyaṃ kathaṃ samuṭṭhāpesuṃ āvuso cammasāṭakaparibbājako asantasampaggahaṇaṃ katvā vināsampattoti. Satthā āgantvā kāyanuttha bhikkhave etarahi kathāya sannisinnāti pucchitvā imāya nāmāti vutte na bhikkhave idāneva pubbepesa asantasampaggahaṃ katvā vināsaṃ Pattoti vatvā atītaṃ āhari.

Atīte bārāṇasiyaṃ brahmadatte rajjaṃ kārente bodhisatto ekasmiṃ vāṇijakule nibbattitvā vaṇijjaṃ karoti. Tadā eko cammasāṭakaparibbājako bārāṇasiyaṃ bhikkhāya caranto eḷakānaṃ yujjhanaṭṭhānaṃ patvā eḷakaṃ osakkantaṃ disvā apacitiṃ me karotīti saññāya appaṭikkamitvā imesaṃ ettakānaṃ manussānaṃ antare ayaṃ eko eḷako amhākaṃ guṇaṃ jānātīti añjaliṃ paggayha ṭhitakova paṭhamaṃ gāthamāha