vānarajātakaṃ

asakkhiṃ vata attānanti idaṃ satthā veḷuvane viharanto devadattassa vadhāya parisakkanaṃ ārabbha kathesi. Vatthu vitthāritameva.

Atīte pana bārāṇasiyaṃ brahmadatte rajjaṃ kārente bodhisatto himavantappadese kapiyoniyaṃ nibbattitvā vayappatto gaṅgātīre vasi. Athekā antogaṅgāya suṃsumārī bodhisattassa hadayamaṃse dohaḷaṃ uppādetvā suṃsumārassa kathesi. So taṃ kapiṃ udake nimmujjāpetvā māretvā hadayamaṃsaṃ suṃsumāriyā dassāmīti cintetvā mahāsattaṃ āha ehi samma antaradīpake ambaphalaṃ khādituṃ gacchāmāti. Ahaṃ kathaṃ gamissāmīti āha. Taṃ mama piṭṭhiyaṃ nisīdāpetvā nessāmīti. So tassa cittaṃ ajānanto laṅghitvā

Piṭṭhiyaṃ nisīdi. Suṃsumāro thokaṃ gantvā nimmujjituṃ ārabhi. Atha naṃ bānaro kiṃ maṃ bho udake nimmujjāpesīti āha. Ahantaṃ māretvā tava hadayamaṃsaṃ mama bhariyāya dassāmīti. Handa tvaṃ mama hadayamaṃsaṃ ureti maññasīti. Atha kahaṃ te ṭhapitanti. Etaṃ udumbare olambantaṃ na passasīti. Passāmi dassasi pana meti. Āma dassāmīti. Suṃsumāro dandhatāya naṃ gahetvā nadītīre udumbaramūlaṃ gato. Bodhisatto tassa piṭṭhito laṅghitvā udumbararukkhe nisinno imā gāthā abhāsi