Kukkuṭajātakaṃ

sucittapattacchādanāti idaṃ satthā jetavane viharanto ekaṃ ukkaṇṭhitabhikkhuṃ ārabbha kathesi.

Taṃ hi bhikkhuṃ satthā kasmā ukkaṇṭhitosīti pucchitvā ekaṃ alaṅkatapaṭiyattaṃ itthiṃ disvā kilesavasena bhanteti vutte bhikkhu itthiyo nāma vañcetvā upalāpetvā attano vasaṃ gatakāle vināsaṃ pāpenti lolavilārī viya hontīti vatvā tuṇhī ahosi tena yācito atītaṃ āhari

atīte bārāṇasiyaṃ brahamdatte rajjaṃ kārente bodhisatto araññe kukkuṭayoniyaṃ nibbattitvā anekasatakukkuṭaparivāro araññe vasati. Tassāvidūre ekā vilārikāpi vasati. Sā ṭhapetvā bodhisattaṃ sesakukkuṭe upāyena vañcetvā khādi. Bodhisatto tassā gahaṇaṃ na gacchati. Sā cintesi ayaṃ kukkuṭo ativiya satho amhākañca sathabhāvaṃ upāyakusalabhāvañca na jānāti imaṃ mayā bhariyā te bhavissāmīti upalāpetvā attano vasaṃ āgatakāle khādituṃ vaṭṭatīti. Sā tena nisinnarukkhamūlaṃ gantvā vaṇṇabhāsitapubbaṅgamāya vācāya taṃ yācamānā paṭhamaṃ gāthamāha