Nāma kīdisoti kathaṃ samuṭṭhāpesuṃ. Eko seyyathāpi jhāmakhāṇukoti āha. Dutiyo seyyathāpi nigrodharukkhoti. Tatiyo seyyathāpi maṃsapesīti. Catuttho seyyathāpi sirisarukkhoti. Te aññamaññassa kathāya aparituṭṭhā pitu santikaṃ gantvā deva kiṃsuko nāma kīdisoti pucchitvā tumhehi kiṃ kathitanti vutte attano kathitanīhāraṃ rañño kathesuṃ. Rājā catūhipi tumhehi kiṃsuko diṭṭho, kevalaṃ vo kiṃsukassa dassento sārathi imasmiṃ kāle kiṃsuko kīdiso, imasmiṃ kāle kīdisoti vibhajitvā na pucchito, tena vo kaṅkhā uppannāti vatvā paṭhamaṃ gāthamāha

sabbehi kiṃsuko diṭṭho, kinnvettha vicikicchatha,

na hi sabbesu ṭhānesu sārathī paripucchitoti.

Tattha na hi sabbesu ṭhānesu sārathī paripucchitoti sabbehi vo kiṃsuko diṭṭho, kinnu tumhe ettha vicikicchatha, sabbesu ṭhānesu kiṃsuko ceso, tumhehi pana na hi sabbesu ṭhānesu sārathī paripucchito, tena vo kaṅkhā uppannāti.