Imaṃ tuṇḍehi pakkhehi pādā himaṃ viheṭhatha

chavaṃ himaṃ vināsetha nāyaṃ saṃvāsanārahoti.

Tattha nāssa sīlanti na assa sīlaṃ. Anaññāyāti ajānitvā. Bhutvāti khāditvā. Vācāya no ca kāyenāti ayaṃ hi vacaneneva dhammaṃ carati kāyena ca pana na karoti. Na taṃ dhammaṃ adhiṭṭhitoti tasmā jānitabbo yathāyaṃ dhammaṃ bhaṇati na taṃ adhiṭṭhito na tasmiṃ dhamme patiṭṭhito. Vācāya sakhiloti vacanena mudu. Manopaviduggoti manasā paviduggo duppavedito. Paṭicchannoti yasmiṃ vile sayati tena channo. Kūpassayoti vilāsayo. Dhammaddhajoti sucaritadhammaddhajaṃ katvā vicaraṇena dhammaddhajo. Gāmanigamāsu sādhūti gāmesu ceva nigamesu ca sādhu. Sammatoti bhaddakoti sambhāvito. Dujjānoti ayaṃ evarūpo dussīlo paṭicchannakammanto bālisena añāṇena purisena na sakkā jānituṃ. Pādā himanti attano attano pādena ca imaṃ. Viheṭhathāti paharatha. Chavanti lāmakaṃ. Nāyanti ayaṃ amhehi saddhiṃ ekasmiṃ ṭhāne saṃvāsaṃ na arahatīti.

Evañca pana vatvā sakuṇajeṭṭhako sayameva laṅghitvā tassa Sīsaṃ tuṇḍena pahari. Avasesā sakuṇā tuṇḍanakhapādapakkhehi pahariṃsu. So tattheva jīvitakkhayaṃ pāpuṇi.