kalyāṇabhāvamhe dijesu sammatā

abhītarūpā vicarāma aṇṇave

na ghāsahetupi karoma pāpanti.

Tattha manussahiṃsāti kāko manusse hiṃsati viheṭheti tena taṃ evaṃ ālapati. Anubbateti aññamaññaṃ anugate sammodamāne piyasaṃvāse. Cakkavāketi cakkavākā nāma sā aṇḍajajātīti pasaṃsanti vaṇṇenti kathenti. Dijesūti yattakā pakkhino nāma tesu mayaṃ kalyāṇabhāvātipi manussesu sammatā. Dutiye atthavikappe manussesu amhe cakkavākāti vadanti dijesu pana mayaṃ kalyāṇabhāvāti no dijā vadanti. Aṇṇaveti imasmiṃ ṭhāne saro aṇṇavoti vutto imasmiṃ padumasare mayameva dve janā paresaṃ ahiṃsanato abhītarūpā vicarāmāti attho. Imissā ca pana gāthāya catutthapadaṃ na Ghāsahetuṃpi karoma pāpanti paṭhanti. Tassattho yasmā mayaṃ ghāsahetu pāpaṃ na karoma tasmā kalyāṇabhāvāti amhe manussesu ca dijesu ca sammatāti.