Tattha asuddhabhakkhosīti tvaṃ thenetvā vañcetvā bhakkhanato asuddhabhakkho. Khaṇānupātīti pamādakkhaṇe anupatanasīlo. Kicchena Teti tassa tava dukkhena annapānaṃ labbhati. Maṃsāni vāti yāni vā susānamajjhe maṃsāni tehi na tussasi. Tatoti pacchā. Upakkosati naṃ sabhāvoti attāva taṃ puggalaṃ garahati. Upakkuṭṭhoti attanāpi aparehipi akkuṭṭho garahito vippaṭisāritāya vaṇṇañca balañca jahāti. Nibbutiṃ bhuñjati yadīti yadi pana paraṃ aviheṭhetvā appakampi dhammaladdhaṃ nibbutiṃ bhojanaṃ bhuñjati. Tadassa hotīti tadā assa paṇḍitassa sarīre balañca vaṇṇañca hoti. Āhāramayenāti nānappakārena āhāreneva. Idaṃ vuttaṃ hoti bho kāka vaṇṇo nāmesa catusamuṭṭhāno so na āhāramatteneva hoti utucittakammehipi hotiyevāti.

Evaṃ cakkavāko anekapariyāyena kākaṃ garahi. Kāko harāyitvā na mayhaṃ tava vaṇṇena atthoti kā kāti vassanto palāyi.

Satthā imaṃ dhammadesanaṃ āharitvā saccāni pakāsetvā jātakaṃ samodhānesi. Saccapariyosāne lolabhikkhu anāgāmiphale patiṭṭhahi. Tadā kāko lolabhikkhu ahosi cakkavākī rāhulamātā cakkavāko pana ahamevāti.

Cakkavākajātakaṃ aṭṭhamaṃ.