atīte bārāṇasiyaṃ brahmadatte rajjaṃ kārente aññatarasmiṃ kāsikagāme ekassa kulassa ekaputtako ahosi nāmena saviṭṭhako nāma. So mātāpitaro paṭijagganto aparabhāge mātari kālakatāya pitaraṃ posesīti sabbaṃ vatthuṃ paccuppannavatthuniyāmeneva kathetabbaṃ. Ayaṃ panettha viseso tadā sā itthī passasi pitu kammaṃ idañcidañca mā karīti vutte kujjhatīti vatvā sāmi pitā te caṇḍo pharuso niccaṃ kalahaṃ karoti jarājiṇṇo byādhipīḷito na cirasseva marissati ahaṃ etena saddhiṃ ekagehe vasituṃ na sakkomi ayaṃpesa katipāhena marissateva tvaṃ etaṃ āmakasusānaṃ netvā āvāṭaṃ khanitvā tattha naṃ pakkhipitvā kuddālena sīsaṃ bhinditvā jīvitakkhayaṃ pāpetvā upari paṃsunā chādetvā āgacchāti āha. So tāya punappunaṃ vuccamāno bhadde purisamaraṇaṃ nāma bhāriyaṃ kathaṃ naṃ māressāmīti. Ahaṃ te upāyaṃ ācikkhissāmīti. Ācikkha tāvāti. Sāmi tvaṃ paccūsakālepi pitu nipannaṭṭhānaṃ gantvā yathā sabbe suṇanti evaṃ mahāsaddaṃ katvā tāta asukagāme tumhākaṃ uddhāraṇako atthi mayi gate na deti tumhākaṃ accayena nassateva sve yānake nisīditvā pātova gacchissāmāti vatvā tena vuttavelāyameva uṭṭhāya yānakaṃ yojetvā tattha naṃ nisīdāpetvā āmakasusānaṃ ānetvā āvāṭaṃ nikkhanitvā corehi acchinnasaddaṃ Katvā māretvā āvāṭe pakkhipitvā sīsaṃ bhinditvā nahāyitvā āgacchāti. Saviṭṭhako attheso upāyoti tassā vacanaṃ sampaṭicchitvā yānakaṃ gamanasajjaṃ akāsi. Tassa paneko sattavassiko putto atthi paṇḍito byatto. So mātu vacanaṃ sutvā mayhaṃ mātā pāpadhammā pitaraṃ me pitughātakammaṃ kāresi ahamassa pitughātakammaṃ kātuṃ na dassāmīti saṇikaṃ gantvā ayyakena saddhiṃ nipajji. Saviṭṭhako ca pitarā vuttavelāya yānakaṃ yojetvā ehi tāta uddhāraṃ sodhessāmāti pitaraṃ yānake nisīdāpesi. Kumārakopi paṭhamataraṃ yānakaṃ abhirūhi. Saviṭṭhako taṃ nivāretuṃ asakkonto teneva saddhiṃ āmakasusānaṃ gantvā pitarañca kumārañca yānakena saddhiṃ ekamante ṭhapetvā sayaṃ otaritvā kuddālapiṭakaṃ ādāya ekasmiṃ paṭicchannaṭṭhāne caturassaāvāṭaṃ khanituṃ ārabhi. Kumārakopi otaritvā tassa santikaṃ gantvā ajānanto viya kathaṃ samuṭṭhāpetvā paṭhamaṃ gāthamāha