Tattha na naṃ umhayateti taṃ mittapaṭirūpakaṃ disvā sitaṃ na karoti pahaṭṭhākāraṃ na dasseti. Na ca naṃ paṭinandatīti tassa kathaṃ paṭigaṇhanto na paṭinandati na tusati. Cakkhūni cassa na dadāti olokentaṃ na oloketi. Paṭilomañcāti tassa kathaṃ paṭippharati paṭisattu hoti. Vaṇṇakāmeti tassa vaṇṇaṃ bhaṇante. Nakkhātīti attano guyhaṃ tassa nācikkhati. Kammantassāti tena katakammaṃ vaṇṇayati. Paññassāti tassa paññaṃ na pasaṃsati ñāṇasampannaṃ na pasaṃsati. Abhaveti avuḍḍhiyā. Tassa nuppajjateti mittapaṭirūpakassa mama mittassāpi ito dassāmīti sati na uppajjati. Nānukampatīti muducittena na cinteti. Labheyyitoti labheyya ito. Ākārāti kāraṇāni. Pavutthanti videsagataṃ. Kelāyikoti kelāyati mamāyati paṭṭheti piheti icchatīti attho. Vācāyāti madhuravacanena taṃ samudācaranto nandati. Sesaṃ vuttapaṭipakkhanayeneva veditabbaṃ.

Rājā mahāsattassa kathāya attamano hutvā tassa mahantaṃ yasaṃ adāsi.

Satthā imaṃ dhammadesanaṃ āharitvā evaṃ mahārāja pubbepesa pañho samuṭṭhāti paṇḍitāva naṃ kathayiṃsu imehi dvattiṃsāya ākārehi amitto ca mitto ca jānitabboti vatvā jātakaṃ samodhānesi tadā rājā ānando ahosi paṇḍito pana ahamevāti.

Mittāmittajātakaṃ dasamaṃ.