13. Bhikkhāparamparajātakaṃ.

Sukhumālarūpaṃ disvānāti idaṃ satthā jetavane viharanto aññataraṃ kuṭumbikaṃ ārabbha kathesi.

So kira saddho hoti pasanno tathāgatassa ceva saṅghassa ca nivaddhaṃ mahāsakkāraṃ karoti. Athekadivasaṃ so cintesi ahaṃ buddharatanassa ceva saṅghassa ca paṇītabhojanāni ceva sukhumavatthāni ca dadanto nivaddhaṃ mahāsakkāraṃ karomi idāni dhammaratanassāpi mahāsakkāraṃ karissāmi kinnu kho tassa sakkāraṃ karontena kātabbanti. So bahūni gandhamālādīni ādāya jetavanaṃ gantvā satthāraṃ vanditvā pucchi ahaṃ bhante dhammaratanassa sakkāraṃ kattukāmo kinnu kho tassa sakkāraṃ karontena kātabbanti. Atha naṃ satthā sace dhammaratanassa sakkāraṃ kātukāmo dhammabhaṇḍāgārikassa ānandassa sakkāraṃ karohīti āha. So sādhūti sampaṭicchitvā punadivase theraṃ nimantetvā mahantena sakkārena attano gehaṃ netvā mahārahāsane nisīdāpetvā gandhamālādīhi pūjetvā nānaggarasabhojanaṃ datvā mahagghe ticīvarapahonake sāṭake Adāsi. Theropi ayampi sakkāro dhammaratanassa kato na mayhaṃ anucchaviko dhammasenāpatissa anucchavikoti cintetvā piṇḍapātañca vatthāni ca vihāraṃ nīharitvā sārīputtattherassa adāsi. Sopi ayaṃ sakkāro dhammaratanassa kato ekantena dhammassāmisammāsambuddhasseva anucchavikoti cintetvā dasabalassa adāsi. Satthā attano uttaritaraṃ adisvā piṇḍapātaṃ paribhuñji cīvarasāṭake aggahesi. Bhikkhū dhammasabhāyaṃ kathaṃ samuṭṭhāpesuṃ āvuso asukonāma kuṭumbiko dhammaratanassa sakkāraṃ karomīti dhammabhaṇḍāgārikassa ānandattherassa adāsi thero nāyaṃ mayhaṃ anucchavikoti dhammasenāpatino adāsi sopi nāyaṃ mayhaṃ anucchavikoti tathāgatassa adāsi tato tathāgato aññaṃ uttaritaraṃ apassanto attano dhammassāmitāya mayhameva so sakkāro anucchavikoti taṃ piṇḍapātaṃ paribhuñjitvā cīvarasāṭake ca gaṇhi evaṃ so piṇḍapāto yathānucchavikatāya dhammassāminova pādamūle gatoti. Satthā āgantvā kāyanuttha bhikkhave etarahi kathāya sannisinnāti pucchitvā imāyanāmāti vutte na bhikkhave idāneva piṇḍapāto paramparāya yathānucchavikaṃ gacchati pubbe anuppannepi buddhe agamāsiyevāti vatvā tehi yācito atītaṃ āhari