Te ubhopi attheso upāyoti veḷunāḷiyo pūretvā kājenādāya paccantanagaraṃ gantvā pānakārakā nāma āgatāti rañño ārocesuṃ. Rājā ne pakkosāpesi. Te tassa pānaṃ upanesuṃ. Rājā dve tayo vāre pivitvā majji. Tassa taṃ ekāhadvīhamattameva ahosi. Atha ne aññaṃpi atthīti pucchi. Atthi devāti. Kuhinti. Himavante devāti. Tenahi ānethāti. Te gantvā ekadve vāre ānetvā nivaddhaṃ gantuṃ na sakkhissāmāti sabbasambhāre sallakkhetvā tassa rukkhatacādīni gahetvā sabbasambhāre pakkhipitvā nagare suraṃ kariṃsu. Nāgarā suraṃ pivitvā pamādaṃ āpannā duggatā ahesuṃ. Nagaraṃ suññaṃ viya ahosi. Tena pānakārakā tato palāyitvā bārāṇasiṃ gantvā pānakārakā āgatāti ārocesuṃ. Rājā ne pakkosāpetvā paribbayaṃ adāsi. Tatthāpi suraṃpi akaṃsu. Taṃpi nagaraṃ tatheva vinassati. Tato palāyitvā sāketaṃ gantvā tato sāketato sāvatthiṃ agamaṃsu. Tadā sāvatthiyaṃ sabbamitto nāma rājā ahosi. So tesaṃ saṅgahaṃ katvā kena vo atthoti pucchitvā sambhāramūlena ceva sālipiṭṭhena ca pañcahi cāṭisatehīti vutte sabbaṃ dāpesi. Te pañcasu cāṭisatesu suraṃ saṇṭhapetvā mūsikabhayena cāti Rakkhanatthāya ekekāya cāṭiyā santike ekekaṃ viḷāraṃ bandhiṃsu. Te paccitvā uttaraṇakāle cāṭikucchīsu paggharantaṃ suraṃ pivitvā mattā niddāyiṃsu. Mūsikā āgantvā tesaṃ kaṇṇanāsikadāṭhikanaṅguṭṭhe khāditvā agamaṃsu. Viḷārā suraṃ pivitvā matāti āyuttakapurisā rañño ārocesuṃ. Rājā visakārakā ete bhavissantīti dvinnaṃpi janānaṃ sīsāni chindāpesi. Te suraṃ pivitvā madhuraṃ devāti viravantāva mariṃsu. Rājā te mārāpetvā cāṭiyo bhindathāti āṇāpesi. Viḷārāpi surāya jiṇṇāya uṭṭhahitvā kīḷantā vicariṃsu. Te disvā rañño ārocayiṃsu. Rājā sace visaṃ assa te mareyyuṃ madhurena tena bhavitabbaṃ pivissāmi nanti nagaraṃ alaṅkārāpetvā rājaṅgaṇe maṇḍapaṃ kārāpetvā alaṅkatamaṇḍape samussitasetacchatte rājapallaṅke nisīditvā amaccagaṇaparivuto suraṃ pātuṃ ārabhi.
Tadā sakko devarājā ke nukho mātāpitupaṭṭhānādīsu appamattā tīṇi sucaritāni pūrentīti lokaṃ voloketvā taṃ rājānaṃ suraṃ pātuṃ nisinnaṃ disvā sacāyaṃ suraṃ pivissati sakalajambūdīpo nassissati yathā na pivati tathā naṃ karissāmīti ekaṃ surāpuṇṇaṃ kumbhaṃ hatthatale ṭhapetvā brāhmaṇavesenāgantvā rañño sammukhaṭṭhāne ākāseyeva ṭhatvā imaṃ kumbhaṃ kīṇatha imaṃ kumbhaṃ kīṇathāti āha. Sabbamittarājā taṃ tathā vadantaṃ ākāse ṭhitaṃ disvā kuto nukho brāhmaṇo āgacchatīti tena saddhiṃ sallapento Tisso gāthā abhāsi