Tattha seyyoti pavaro uttamo. Matiyā upetoti paññāya samannāgato. Elamūgoti lālāmūgo bālo. Putto pitu abbhidā uttamaṅganti attano bālatāya puttopi hutvā pitu uttamaṅgaṃ matthakaṃ makasaṃ māressāmīti dvidhā bhindi tasmā bālamittato paṇḍito amittova seyyoti.

Imaṃ gāthaṃ vatvā bodhisatto uṭṭhāya yathākammaṃ gato. Vaḍḍhakissāpi ñātakā sarīrakiccaṃ akaṃsu.

Satthā evaṃ upāsakā pubbepi makasaṃ paharissāmāti paraṃ paharaṇakamanussā ahesuṃyevāti imaṃ dhammadesanaṃ āharitvā anusandhiṃ ghaṭetvā jātakaṃ samodhānesi tadā gāthaṃ vatvā pakkanto paṇḍitavāṇijo pana ahameva ahosīti.

Makasajātakaṃ catutthaṃ.