Mahānipāta vaṇṇanā

vidhurajātakaṃ

paṇḍu kīsiyāsi dubbalāti idaṃ satthā jetavane viharanto paññāpāramiṃ ārabbha kathesi.

Eka divasamhi bhikkhū dhammasabhāyaṃ kathaṃ samuṭṭhāpesuṃ āvuso aho vata satthā mahāpañño puthupañño javanapañño hāsapañño tikkhapañño nibbedhikapañño parappavādamaddano attano paññānubhāvena khattiyapaṇḍitādīhi abhisaṅkhate sukhumapañhe bhinditvā te dametvā nibbisevane katvā saraṇesu ceva sīlesu ca patiṭṭhapetvā amatagāmimaggaṃ paṭipādesīti. Satthā āgantvā kāyanuttha bhikkhave etarahi kathāya sannisinnāti pucchitvā bhante imāya nāmāti vutte anacchariyaṃ bhikkhave yaṃ tathāgato paramābhisambodhiṃ patto parappavādaṃ bhinditvā khattiyādayo vineyya purimabhavasmiṃ hi anuttaraṃ bodhiñāṇaṃ pariyesantopi tathāgato paññavā parappavādamaddanoyeva tathāhi ahaṃ vidhurapaṇḍitakāle saṭṭhīyojanubbedhe kāḷagiripabbatamuddhani puṇṇakaṃ nāma yakkhasenāpatiṃ ñāṇabalena dametvā nibbisevanaṃ katvā pañcasīlesu patiṭṭhapento attano jīvitadānaṃ dāpesinti vatvā tuṇhī ahosi tehi yācito atītaṃ āhari.