khemā vutti siyā evaṃ evaṃ nu assa saṅgaho

abyāpajjho siyā evaṃ saccavādī ca māṇavo

asmā lokā paraṃ lokaṃ evaṃ pecca na socatīti.

Tattha taṃ tatthāti bhikkhave taṃ rājānaṃ tattha dhammasabhāyaṃ. Gatimāti varaññāṇagatiyā gatimā. Dhitimāti abbhocchinnaviriyena dhitisā. Matimāti bhūrisamāya vipulāya paññāya matimā. Atthadassināti saṇhasukhumaatthadassinā ñāṇena atthadassinā. Saṃkhātāti paricchinditvā jānanañāṇasaṃkhātāya paññāya sabbadhammānaṃ saṃkhātā vidhurapaṇḍito etaṃ na sādhāraṇadārassāti ādivacanaṃ abravi. Tattha yo paresaṃ dāresu aparajjhati so sādhāraṇadāro nāma tādiso nāssa na bhaveyya. Sādhumekakoti sādhurasaṃ paṇītabhojanaṃ aññesaṃ adatvā ekakova na bhuñjeyya. Lokāyatikanti anatthanissitaṃ saggamaggānaṃ Adāyakaṃ aniyyānikaṃ vitaṇḍasallāpaṃ lokāyatikavādaṃ na seveyya. Netaṃ paññāya vaḍḍhananti na hi etaṃ lokāyatikaṃ paññāya vaḍḍhanaṃ. Sīlavāti akhaṇḍehi pañcasīlehi samannāgato. Vattasampannoti gharāvāsaṃ vasanto rājavattena upagato. Appamattoti kusaladhammesu appamatto. Nivātavuttīti atimānaṃ akatvā nīcavutti ovādānusāsanasampaṭicchako. Atthaddhoti thaddhamacchariyarahito. Suratoti soraccena samannāgato. Sakhiloti pemanīyavacano. Mudūti kāyavacīcittehi apharuso. Saṅgahetā ca mittānanti kalyāṇamittānaṃ saṅgahakaro dānādīsuyeva yo yena saṅgahaṃ gacchati tassa teneva saṅgāhako hoti. Saṃvibhāgīti dhammikasamaṇabrāhmaṇādīnañceva kapaṇādīnañca saṃvibhāgakaro. Vidhānavāti imasmiṃ kāle kasituṃ vaṭṭati imasmiṃ kāle vappituṃ vaṭṭatīti evaṃ sabbakiccesu vidhānasampanno. Tappeyyāti gahitagahitāni bhājanāni pūretvā dadamāno tappeyya. Dhammakāmoti paveṇīdhammaṃpi sucaritadhammaṃpi kāmayamāno patthayamāno sutādhāroti sutassa ādhāraṇabhūto. Paripucchakoti dhammikasamaṇabrāhmaṇe upasaṅkamitvā kiṃ bhante kusalanti ādīhi vacanehi paripucchanasīlo. Sakkaccanti gāravena. Evaṃ nu assa saṅgahoti saṅgahopi evaṃpi kato nāma bhaveyya. Saccavādīti evaṃ paṭipannoyeva saccavādī nāma siyā.