eseyyā rājavasatī vattamāno yathā naro

ārādhayati rājānaṃ pūjaṃ labhati bhattusūti. Tattha kumbhimhi añjaliṃ kayirā vāyasaṃ vāpi padakkhiṇanti vuḍḍhiṃ paccāsiṃsanto hi puriso udakabharitaṃ kumbhiṃ disvā tassa añjaliṃ kareyya vāyasaṃ vāpi sakuṇañca padakkhiṇaṃ kareyya (yesaṃ) añjaliṃ katvā padakkhiṇaṃ karontassa te kiñci dātuṃ na sakkonti. Kimevāti yo pana sabbakāmānaṃ dātā dhīro taṃ rājānaṃ kiṃ kāraṇā na namasseyya rājāyeva hi namassitabbo ca ārādhetabbo cāti. Pajjunnorivāti megho viya. Eseyyā rājavasatīti ayyā yā ayaṃ mayā kathitā esā rājavasatī nāma rājasevakānaṃ anusāsanī. Yathāti yāya rājavasatiyā vattamāno naro rājānaṃ ārādheti rājūnañca santikā pūjaṃ labhati esāti. Evaṃ asamadhuro vidhuro buddhalīlāya rājavasatiṃ kathesīti.

Rājavasatīkaṇḍaṃ niṭṭhitaṃ.

Evaṃ puttadāramittasuhajjādayo anusāsantasseva tassa tatiyo divaso jāto. So divasapāripūriṃ ñatvā pātova nahātvā nānaggarasabhojanaṃ bhuñjitvā rājānaṃ apaloketvā māṇavena saddhiṃ gamissāmīti cintetvā ñātigaṇaparivuto rājanivesanaṃ gantvā rājānaṃ vanditvā ekamantaṃ ṭhito vattabbayuttakavacanaṃ avoca.