Tattha sākhāsu selesu asajjamānoti puṇṇako kira cintesi ahaṃ dūraṃ āgantvā imaṃ himavantappadese rukkhapabbatesu pothento māretvā hadayamaṃsaṃ ādāya kaḷevaraṃ pabbatantare chaḍḍetvā nāgabhavanaṃ gantvā taṃ vimalāya deviyā datvā irandatiṃ gahetvā paccāgamissāmīti.

So rukkhe ca pabbate ca paharitvā tesaṃ majjheyeva assaṃ pesesi. Mahāsattassānubhāvena rukkhāpi pabbatāpi tassa sarīrato ubhosu passesu ratanamattaṃ paṭikkamanti. So mato vā no vāti parivattetvā mahāsattassa mukhaṃ olokento kāñcanādāsamiva Vippasannaṃ mukhaṃ disvā ayaṃ evaṃ na maratīti punapi himavantappadese rukkhe ca pabbate ca tikkhattuṃ pothentopi tesaṃ majjheyeva assaṃ pesesi. Tatheva rukkhāpi pabbatāpi dūrataraṃ paṭikkamantiyeva. Mahāsatto paramakilantakāyo ahosi. So idāni naṃ vātakkhandhe cuṇṇavicuṇṇaṃ karissāmīti cintetvā vātakkhandhe assaṃ pesesi. Mato vā no vāti parivattetvā vikasitapadumaṃ viya mahāsattassa mukhaṃ olokesi. So kodhābhibhūto sattamaṃ vātakkhandhaṃ pakkhandi. Bodhisattassānubhāvena vātakkhandho dvidhā hutvā bodhisattassa okāsaṃ adāsi. Tato verambhavātepi pahari. Verambhavātopi satasahassa asanīsaddo viya dvidhā hutvā bodhisattassa okāsaṃ adāsi. Sopi tassa antarāyābhāvaṃ passanto taṃ ādāya kāḷāgiripabbataṃ agamāsi. Tena vuttaṃ.

Sākhāsu selesu asajjamāno

kāḷāgiriṃ khippamupāgamāsīti.