na imassa jīvena mamatthi kiñci

hantvānimaṃ hadayaṃ ānayissanti.

Tattha soti so puṇṇako. Tattha gantvānāti gantvā tattha kāḷāgirimatthake ṭhito. Cetanakāti khaṇe khaṇe uppajjamānā cetnā uccāpi avacāpi uppajjanti ṭhānaṃ kho panetaṃ na vijjati yametassa jīvitadānacetanāpi uppajjeyyāti imassa pana jīvena tahiṃ nāgabhavane mama appamattakampi kiñci kiccaṃ natthi idhevimaṃ hantvāna assa hadayaṃ ānayissāmīti sanniṭṭhānamakāsīti attho.

Tato puṇṇako cintesi yannūnāhaṃ imaṃ sahatthena amāretvā bheravarūpadassanena jīvitakkhayaṃ pāpeyyanti. So bheravayakkharūpaṃ nimmitvā tajjento āgantvā tampātetvā pāde gahetvā dantantare katvā Khāditukāmo viya ahosi. Evaṃ santepi mahāsattassa lomahaṃsanamattampi nāhosi. Tato sīharūpena ca mattamahāhatthirūpena ca āgantvā dāṭhāhi ceva dantehi ca ovijjhitukāmo viya hutvā tathāpi abhāyantassa ekadoṇikanāvappamāṇaṃ mahantaṃ sappavaṇṇaṃ nimmitvā assasanto āgantvā sakalasarīraṃ veṭhetvā matthake phaṇaṃ dhāresi. Tassa sārajjanamattampi nāhosi. Atha naṃ pabbatamatthake ṭhapetvā pātetvā cuṇṇavicuṇṇaṃ karissāmīti mahāvātaṃ samuṭṭhāpesi. So tassa kesaggamattampi na cālesi. Atha naṃ tattheva pabbatamatthake ṭhapetvā hatthī viya khajjūrīrukkhaṃ pabbataṃ aparāparaṃ cālesi. Tathāpi naṃ ṭhitaṭṭhānato kesaggamattampi cāletuṃ nāsakkhi. Tato saddasantāsenassa hadayaphālanaṃ katvā māressāmīti antopabbataṃ pavisitvā paṭhaviñca nabhañca ekaninnādaṃ karonto mahānādaṃ nadi. Evampissa sārajjanamattampi nāhosi. Jānāti hi mahāsatto yakkhasīhahatthināgarājavesena āgatopi vātavuṭṭhipabbatacalanānaṃ kārakopi antopabbataṃ pavisitvā nādaṃ visajjentopi māṇavoyeva na aññoti. Tato yakkho cintesi nāhaṃ imaṃ bāhirupakkamehi māretuṃ sakkomi sahattheneva naṃ māressāmīti. So mahāsattaṃ pabbatamuddhani ṭhapetvā pabbatapādaṃ gantvā maṇikkhandhe paṇḍukambalasuttaṃ pavesento viya nadanto antopabbatena uggantvā mahāsattaṃ daḷhaṃ gahetvā parivattetvā adhosiraṃ katvā anālambe ākāse visajjesi.