Tattha asaṇṭhatanti ekāhaṃ davihampi ekato avuṭṭhapubbaṃ. Yo āsanenāpīti yo evarūpaṃ āsanamattenāpi nimanteyya pageva annapānādīhi. Tassevāti tassa eva pubbakārissa atthaṃ puriso karoteva. Yātānuyāyīti pubbakārinā yātassa maggassa anuyāyī. Paṭhamaṃ karonto hi yāyī nāma pacchā karonto pana anuyāyī nāmāti evaṃ paṇḍitā kathenti ayaṃ devarāja paṭhamo sādhunaradhammo. Allañca pāṇinti darūbhakaṃ attano bhuñjanahatthameva dahanto hi mittadubbhī nāma hoti. Iti allahatthassa ajjhāpanaṃ nāma ayaṃ dutiyo sādhunaradhammo. Na tassāti tassa sākhaṃ vā pattaṃ vā aṅkuraṃ vā na bhindeyya kiṃ kāraṇā mittadubbho hi pāpako iti Paribhuttacchāyassa acetanassa rukkhassāpi pāpaṃ karonto mittadubbhī nāma hoti kimaṅgaṃ pana manussabhūtassa. Evaṃ mittesu adubbhanaṃ nāma ayaṃ tatiyo sādhunaradhammo. Dajjitthiyāti dadeyya itthiyā. Sammatāyāti ahamevassāpi yo na añño mamaññeva sā itthī icchatīti evaṃ suṭṭhu sammatāya. Laddhā khaṇanti aticārassa okāsaṃ labhitvā. Asatīnanti asaddhammena samannāgatānaṃ itthīnaṃ. Iti mātugāmaṃ nissāya pāpassa akaraṇaṃ nāma ayaṃ catuttho sādhunaradhammo. So dhammiko hohīti so tvaṃ devarāja imehi catūhi sādhunaradhammehi yutto dhammiko hohīti.
Evaṃ mahāsatto yakkhassa cattāro sādhunaradhamme buddhalīlāya kathesi. Te suṇantoyeva puṇṇako sallakkhesi catūsu ṭhānesu paṇḍito attano jīvitameva yācati ayaṃ kho pana mayhaṃ pubbe asaṇṭhatasseva sakkāramakāsi ahamassa nivesane tīhaṃ mahantaṃ yasaṃ anubhavanto vasiṃ ahañca imaṃ pāpakammaṃ karonto mātugāmaṃ nissāya karomi sabbathāpi ahameva mittadubbhī sace paṇḍitaṃ aparajjhissāmi na sādhunaradhamme vattissāmi nāma kiṃ me nāgamāṇavikāya indapattavāsīnaṃ assumukhāni hasāpento imaṃ vegena netvā dhammasabhāyaṃ otāressāmīti cintetvā āha
avasiṃ ahaṃ tuyhaṃ tīhaṃ agāre
annena pānena upaṭṭhitosmi