Tattha anumoditthāti pamuditacitto somanassappatto. Sabbe te lacchasi vareti sabbe te vare labhasi.

Evaṃ sakko dasa vare datvā pamuditacitto hutvā tuṭṭhamānaso ahosi.

. Dasavaragāthā niṭṭhitā.

Iti sā vare gahetvā tato cutā maddarañño aggamahesiyā kucchimhi nibbatti. Jāyamānāya candanacuṇṇena paripphositena viya sarīrena jātattā tenassā nāmaggahaṇadivase phussatītveva nāmaṃ kariṃsu. Sā mahantena parivārena vaḍḍhitvā soḷasavassikakāle uttamarūpadharā ahosi. Atha naṃ sivimahārājā puttassa sañjayakumārassatthāya ānetvā tassa chattaṃ ussāpetvā taṃ soḷasannaṃ itthīsahassānaṃ jeṭṭhakaṃ katvā aggamahesiṭṭhāne ṭhapesi.