yadā hemantake māse vanaṃ dakkhasi pupphitaṃ

opupphāni padumāni na rajjassa sarissasīti.

Tattha mañjuketi madhurasare madhurakathe. Kareṇusaṃghassāti hatthinīghaṭāya. Yūthassāti hatthiyūthassa purato gacchanto. Ubhatoti ubhato maggassa. Vanavikāseti vanaghaṭāyo. Kāmadanti mayhaṃ sabbakāmadadaṃ. Sindhuyāti nadiyā. Vasamānassulūkassāti ulūkasakuṇassa vasato. Bāḷānanti bāḷamigānaṃ. Tesaṃ hi sāyaṇhasamaye so saddo pañcāṅgikaturiyasaddo viya bhavissati tasmā tesaṃ saddaṃ sutvā na rajjassa sarissasīti vadati. Varahinanti kalāpasañchannaṃ. Matthakāsinanti niccaṃ pabbatamatthake nisinnaṃ. Mattakāsinantipi pāṭho. Kāmamadamattaṃ hutvā kāsinanti attho. Bimbajālanti rattaṅkurapattaṃ. Opupphānīti olambakapupphāni patitapupphāni.

Evaṃ maddī himavantavāsinī viya ettakāhi gāthāhi himavantaṃ vaṇṇesi.