Tattha paḷitānīti palātamakkhikāni madhūni viya. Patitā chamāti bhūmiyaṃ patitāni ambapakkāni viya ca. Evaṃ mama putte pabbājite deva tava raṭṭhaṃ sabbasādhāraṇaṃ bhavissatīti dassesi. Nikkhīṇapattoti paggharitapatto. Apaviṭṭho amaccehīti mama puttena sahajātehi saṭṭhīsahassehi amaccehi chaḍḍito hutvā. Vihaññasīti kilamissasi. Sivīnaṃ vacanāti sivīnaṃ vacanena mā naṃ adūsakaṃ mama puttaṃ pabbājesīti.

Taṃ sutvā rājā āha

dhammassāpacitiṃ kummiṃ sivīnaṃ vinayaṃ dhajaṃ

pabbājemi sakaṃ puttaṃ pāṇā piyataro hi meti.