สิกขาบทที่ ๕ เรื่องภิกษุณีรูปหนึ่ง

Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena aññatarā bhikkhunī sāvatthiyaṃ aññatarissā visikhāya piṇḍāya caramānā yena aññataraṃ kulaṃ tenupasaṅkami upasaṅkamitvā paññatte āsane nisīdi . athakho te manussā taṃ bhikkhuniṃ bhojetvā etadavocuṃ aññāpi ayye bhikkhuniyo āgacchantūti. {346.1} Athakho sā bhikkhunī kathaṃ 1- aññā bhikkhuniyo nāgaccheyyunti bhikkhuniyo upasaṅkamitvā etadavoca amukasmiṃ ayye okāse vālā sunakhā caṇḍo balibaddo cikkhallo okāso mā kho tattha agamitthāti . aññatarāpi bhikkhunī tassā visikhāya piṇḍāya caramānā yena taṃ kulaṃ tenupasaṅkami upasaṅkamitvā paññatte āsane nisīdi . athakho te manussā taṃ bhikkhuniṃ bhojetvā etadavocuṃ kissa ayye bhikkhuniyo na āgacchantīti. Athakho sā bhikkhunī tesaṃ manussānaṃ etamatthaṃ ārocesi . @Footnote: 1 Ma. Yu. kathaṃ hi nāma. Manussā ujjhāyanti khīyanti vipācenti kathaṃ hi nāma bhikkhunī kulaṃ maccharāyissatīti .pe. saccaṃ kira bhikkhave bhikkhunī kulaṃ maccharāyatīti . saccaṃ bhagavāti . vigarahi buddho bhagavā kathaṃ hi nāma bhikkhave bhikkhunī kulaṃ maccharāyissati netaṃ bhikkhave appasannānaṃ vā pasādāya .pe. evañca pana bhikkhave bhikkhuniyo imaṃ sikkhāpadaṃ uddisantu {346.2} yā pana bhikkhunī kulamaccharinī assa pācittiyanti.

Yā panāti yā yādisā .pe. bhikkhunīti .pe. ayaṃ imasmiṃ atthe adhippetā bhikkhunīti . kulaṃ nāma cattāri kulāni khattiyakulaṃ brāhmaṇakulaṃ vessakulaṃ suddakulaṃ . maccharinī assāti kathaṃ bhikkhuniyo nāgaccheyyunti bhikkhunīnaṃ santike kulassa avaṇṇaṃ bhāsati āpatti pācittiyassa . kulassa vā santike bhikkhunīnaṃ avaṇṇaṃ bhāsati āpatti pācittiyassa.

Anāpatti [1]- na maccharāyantī santaṃyeva ādīnavaṃ ācikkhati ummattikāya ādikammikāyāti. --------