สิกขาบทที่ ๗ เรื่องภิกษุณีหลายรูป

Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena sambahulā bhikkhuniyo gāmakāvāse vassaṃ vutthā sāvatthiṃ agamaṃsu . bhikkhuniyo tā bhikkhuniyo etadavocuṃ katthayyāyo vassaṃ vutthā kacci bhikkhu saṅgho pavāritoti . na mayaṃ ayye bhikkhusaṅghaṃ pavāremāti . yā tā bhikkhuniyo appicchā .pe. tā ujjhāyanti khīyanti vipācenti kathaṃ hi nāma bhikkhuniyo vassaṃ vutthā bhikkhusaṅghaṃ nappavāressantīti .pe. saccaṃ kira bhikkhave bhikkhuniyo vassaṃ vutthā bhikkhusaṅghaṃ nappavārentīti. Saccaṃ bhagavāti. {352.1} Vigarahi buddho bhagavā kathaṃ hi nāma bhikkhave bhikkhuniyo vassaṃ vutthā bhikkhusaṅghaṃ nappavāressanti netaṃ bhikkhave appasannānaṃ vā pasādāya .pe. evañca pana bhikkhave bhikkhuniyo imaṃ sikkhāpadaṃ uddisantu {352.2} yā pana bhikkhunī vassaṃ vutthā ubhatosaṅghe tīhi ṭhānehi nappavāreyya diṭṭhena vā sutena vā parisaṅkāya vā pācittiyanti.

Yā panāti yā yādisā .pe. bhikkhunīti .pe. ayaṃ imasmiṃ atthe adhippetā bhikkhunīti . vassaṃ vutthā nāma purimaṃ vā temāsaṃ pacchimaṃ vā temāsaṃ vutthā . ubhatosaṅghe tīhi ṭhānehi nappavāressāmi diṭṭhena vā sutena vā parisaṅkāya vāti dhuraṃ Nikkhittamatte āpatti pācittiyassa.

Anāpatti sati antarāye pariyesitvā na labhati gilānāya āpadāsu ummattikāya ādikammikāyāti. ---------