๕. คันธมาลิยเถราปทาน (๙๕)

TIPITAKA Volume 32 : PALI ROMAN Sutta Pitaka Vol 24 : Sutta. Khu. Apa(1) Pañcamaṃ gandhamāliyattherāpadānaṃ (95)

[97] |97.24| Siddhatthassa bhagavato gandhathūpaṃ akāsahaṃ sumanehi paṭicchannaṃ buddhānucchavikaṃ ahaṃ. |97.25| Kañcanagghiyasaṅkāsaṃ buddhaṃ lokagganāyakaṃ indīvaraṃva jalitaṃ ādittaṃva hutāsanaṃ |97.26| byagghusabhaṃva pavaraṃ abhijātaṃva kesariṃ nisinnaṃ samaṇānaggaṃ bhikkhusaṅghapurakkhataṃ. |97.27| Vanditvā satthuno pāde pakkāmiṃ uttarāmukho catunavute ito kappe gandhamālaṃ yato adaṃ. |97.28| Buddhe katassa kārassa phalenāhaṃ visesato duggatiṃ nābhijānāmi buddhapūjāyidaṃ phalaṃ. |97.29| Cattāḷīsamhi ekūne kappe āsiṃsu soḷasa devagandhasanāmā te rājāno cakkavattino. |97.30| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā gandhamāliyo thero imā gāthāyo abhāsitthāti. Gandhamāliyattherassa apadānaṃ samattaṃ.