๗. มธุปิณฑิกเถราปทาน (๙๗)

๙๙. ๗. มธุปิณฺฑิกตฺเถราปทานวณฺณนา

วิวเน ๑- กานเน ทิสฺวาติอาทิกํ อายสฺมโต มธุปิณฺฑิกตฺเถรสฺส อปทานํ. อยมฺปิ ปุริมพุทฺเธสุ กตาธิกาโร ตตฺถ ตตฺถ ภเว วิวฏฺฏูปนิสฺสยานิ ปุญฺญานิ อุปจินนฺโต สิทฺธตฺถสฺส ภควโต กาเล เนสาทโยนิยํ นิพฺพตฺโต มหาอรญฺเญ ปฏิวสติ. ตทา วิเวกาภิรติยา สมฺปตฺตํ สิทฺธตฺถํ ภควนฺตํ ทิสฺวา สมาธิโต วุฏฺฐิตสฺส ตสฺส สุมธุรํ มธุํ อทาสิ. ตตฺถ จ ปสนฺนมานโส วนฺทิตฺวา ปกฺกามิ. โส เตเนว ปุญฺเญน สมฺปตฺตึ อนุภวนฺโต เทวมนุสฺเสสุ สํสริตฺวา อิมสฺมึ พุทฺธุปฺปาเท กุลเคเห นิพฺพตฺโต วุทฺธิปฺปตฺโต สตฺถริ ปสีทิตฺวา ปพฺพชิโต นจิรสฺเสว อรหา อโหสิ.

โส อปรภาเค อตฺตโน ปุพฺพกมฺมํ สริตฺวา โสมนสฺสชาโต ปุพฺพจริตาปทานํ ปกาเสนฺโต วิวเน กานเน ทิสฺวาติอาทิมาห. ตตฺถ วิวเนติ วิเสเสน วนํ ปตฺถฏํ วิวนํ หตฺถิอสฺสรถสทฺเทหิ เภริสทฺเทหิ จ วตฺถุกามกิเลสกาเมหิ จ วิคตํ พฺยาปคตนฺติ อตฺโถ, กานนสงฺขาเต มหาอรญฺเญ วิวเนติ สมฺพนฺโธ. โอสธึว ๒- วิโรจนฺตนฺติ ๓- ภววฑฺฒกิชนานํ อิจฺฉิติจฺฉิตํ นิปฺผาเทตีติ โอสธํ. โอชานิพฺพตฺติการณํ ปฏิจฺจ ยาย ตารกาย อุคฺคตาย คณฺหนฺตีติ สา โอสธิ. ๓- โอสธิตารกา อิว วิโรจนฺตีติ วตฺตพฺเพ คาถาพนฺธสุขตฺถํ อุทฺธรนฺติ "โอสธึว วิโรจนฺตนฺ"ติ จ วุตฺตํ. เสสํ สพฺพตฺถ อุตฺตานเมวาติ.

มธุปิณฺฑิกตฺเถราปทานวณฺณนา นิฏฺฐิตา.

@เชิงอรรถ: ๑ ปาฬิ. วิปิเน. ๒ ปาฬิ. โอสธีว.

@๓-๓ สี. อภิวฑฺฒติ โชตนํ อิจฺฉิติจฺฉิตํ นิปฺผาเทตีติ โอสธิ.