๘. อาสนุปัฏฐายกเถราปทาน (๑๐๘)

|๑๑๐.๔๗| กานนํ วนโมคฺคยฺห อปฺปสทฺทํ นิรากุลํ สีหาสนํ มยา ทินฺนํ อตฺถทสฺสิสฺส ตาทิโน ฯ |๑๑๐.๔๘| มาลหตฺถํ คเหตฺวาน กตฺวา จ นํ ปทกฺขิณํ สตฺถารํ ปยิรุปาสิตฺวา ปกฺกามึ อุตฺตรามุโข ฯ |๑๑๐.๔๙| เตน กมฺเมน ทิปทินฺท โลกเชฏฺฐ นราสภ สนฺนิพฺพาเปมิ อตฺตานํ ภวา สพฺเพ สมูหตา ฯ |๑๑๐.๕๐| อฏฺฐารเส กปฺปสเต ยํ ทานมททึ ตทา ทุคฺคตึ นาภิชานามิ สีหาสนสฺสิทํ ผลํ ฯ |๑๑๐.๕๑| อิโต สตฺตกปฺปสเต สนฺนิพฺพาปกขตฺติโย สตฺตรตนสมฺปนฺโน จกฺกวตฺติ มหพฺพโล ฯ |๑๑๐.๕๒| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา อาสนุปฏฺฐายโก เถโร อิมา คาถาโย อภาสิตฺถาติ ฯ อาสนุปฏฺฐายกตฺเถรสฺส อปทานํ สมตฺตํ ฯ