๙. ปัจจุปัฏฐานสัญญกเถราปทาน (๑๑๙)

|121.72| Atthadassimhi sugate nibbute samanantarā yakkhayoniṃ upapajjiṃ yasaṃ patto cahaṃ tadā. |121.73| Dulladdhaṃ vata me āsi duppabhātaṃ duruṭṭhitaṃ yaṃ me bhoge vijjamāne parinibbāyi cakkhumā. |121.74| Mama saṅkappamaññāya sāgaro nāma sāvako mamuddharitukāmo so āgañchi mama santike 1- . |121.75| Kiṃ nu socasi mā bhāyi cara dhammaṃ sumedhasa anuppadinnā buddhena sabbesaṃ vijjasampadā. |121.76| Yo ca pūjeyya sambuddhaṃ tiṭṭhantaṃ 2- lokanāyakaṃ dhātuṃ sāsapamattampi nibbutassāpi pūjaye. @Footnote: 1 Ma. Yu. santikaṃ. 2 Yu. siddhatthaṃ. |121.77| Same cittappasādamhi samaṃ puññaṃ mahaggataṃ tasmā thūpaṃ karitvāna pūjehi jinadhātuyo. |121.78| Sāgarassa vaco sutvā buddhathūpaṃ akāsahaṃ pañca vasse paricariṃ munino thūpamuttamaṃ. |121.79| Tena kammena dipadinda lokajeṭṭha narāsabha sampattiṃ anubhotvāna arahattaṃ apāpuṇiṃ. |121.80| Bhūripaññāva cattāro sattakappasate ito sattaratanasampannā cakkavattī mahabbalā. |121.81| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā paccupaṭṭhānasaññako thero imā gāthāyo abhāsitthāti. Paccupaṭṭhānasaññakattherassa apadānaṃ samattaṃ.