๔. ปุปผฉทนิยเถราปทาน (๑๓๔)

TIPITAKA Volume 32 : PALI ROMAN Sutta Pitaka Vol 24 : Sutta. Khu. Apa(1) Catutthaṃ pupphachadaniyattherāpadānaṃ (134)

[136] |136.26| Sunando nāma nāmena brāhmaṇo mantapāragū ajjhāyako yācayogo vājapeyyaṃ ayājayi. |136.27| Padumuttaro lokavidū aggo kāruṇiko isi janataṃ anukampanto ambare caṅkami tadā. |136.28| Caṅkamitvāna sambuddho sabbaññū lokanāyako mettāya aphari satte appamāṇaṃ nirūpadhiṃ. |136.29| Vaṇṭe chitvāna pupphāni brāhmaṇo mantapāragū sabbe sisse samānetvā ākāse ukkhipāpayi. |136.30| Yāvatā nagaraṃ āsi pupphānaṃ chadanaṃ tadā buddhassa ānubhāvena sattāhaṃ na vigacchatha. |136.31| Teneva sukkamūlena anubhotvāna sampadā sabbāsave pariññāya tiṇṇo loke visattikaṃ. |136.32| Ekārase kappasate pañcattiṃsāsu khattiyā ambaraṃsasanāmā te cakkavattī mahabbalā. |136.33| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā pupphachadaniyo thero imā gāthāyo abhāsitthāti. Pupphachadaniyattherassa apadānaṃ samattaṃ.