๙. ติกิจฉกเถราปทาน (๑๗๙)

|181.39| Nagare bandhumatiyā vejjo āsiṃ susikkhito āturānaṃ sudukkhīnaṃ 1- mahājanasukhāvaho. |181.40| Byādhitaṃ samaṇaṃ disvā sīlavantaṃ mahājutiṃ pasannacitto sumano bhesajjamadadiṃ tadā. |181.41| Arogo āsi teneva samaṇo saṃvutindriyo asoko nāma nāmena upaṭṭhāko vipassino. |181.42| Ekanavute ito kappe yaṃ osathamadāsahaṃ duggatiṃ nābhijānāmi bhesajjassa idaṃ phalaṃ. |181.43| Ito ca aṭṭhame kappe sabbosathasanāmako sattaratanasampanno cakkavatti mahabbalo. |181.44| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā tikicchako thero imā gāthāyo abhāsitthāti. Tikicchakattherassa apadānaṃ samattaṃ. @Footnote: 1 Ma. sadukkhānaṃ.