๙. สัปปิทายกเถราปทาน (๒๑๙)

TIPITAKA Volume 32 : PALI ROMAN Sutta Pitaka Vol 24 : Sutta. Khu. Apa(1) Navamaṃ sappidāyakattherāpadānaṃ (219)

[221] |221.44| Nisinno pāsādavare nārīgaṇapurakkhato byādhitaṃ samaṇaṃ disvā atināmesahaṃ gharaṃ. |221.45| Upaviṭṭhaṃ mahāvīraṃ devadevaṃ narāsabhaṃ sappitelaṃ mayā dinnaṃ siddhatthassa mahesino. |221.46| Passaddhadarathaṃ disvā vippasannamukhindriyaṃ vanditvā satthuno pāde anusaṃsāvayiṃ pure. |221.47| Disvā maṃ supasannantaṃ iddhiyā pāramiṃ gato nabhaṃ abbhuggami vīro haṃsarājāva ambare. |221.48| Catunavute ito kappe yaṃ dānamadadiṃ tadā duggatiṃ nābhijānāmi sappitelassidaṃ phalaṃ. |221.49| Ito sattarase kappe dutidevasanāmako sattaratanasampanno cakkavatti mahabbalo. |221.50| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā sappidāyako thero imā gāthāyo abhāsitthāti. Sappidāyakattherassa apadānaṃ samattaṃ.