๔. เบญจสีลสมาทานนิยเถราปทาน (๒๔)

[๒๖] |๒๖.๑๓๖| นคเร จนฺทวติยา ภติโก ๓- อาสิหํ ตทา ปรกมฺมายเน ยุตฺโต ปพฺพชฺชํ น ลภามหํ ฯ @เชิงอรรถ: ๑ ม. สมฺมาธมฺมํ ภาเวตฺวา ฯ ๒ ม. สรโณ วนฺทติ สตฺถุโน ฯ ยุ. สรเณ ... ฯ @ ๓ ม. ยุ. ภตโก อาสหํ ตทา ฯ |๒๖.๑๓๗| มหนฺธการปิหิตา ติวิธคฺคีหิ ทยฺหเร เกน นุ โข อุปาเยน วิสํยุตฺโต ภเว อหํ ฯ |๒๖.๑๓๘| เทยฺยธมฺโม จ เม นตฺถิ วราโก ภติโก อหํ ยนฺนูนาหํ ปญฺจสีลํ รกฺเขยฺยํ ปริปูรยํ ฯ |๒๖.๑๓๙| อโนมทสฺสิสฺส มุนิโน นิสโภ นาม สาวโก ตมหํ อุปสงฺกมฺม ปญฺจสิกฺขาปทคฺคหึ ฯ |๒๖.๑๔๐| วสฺสสตสหสฺสานิ อายุ วิชฺชติ ตาวเท ตาวตา ปญฺจสีลานิ ปริปุณฺณานิ โคปยึ ฯ |๒๖.๑๔๑| มจฺจุกาเล จ สมฺปตฺเต เทวา อสฺสาสยนฺติ มํ รโถ สหสฺสยุตฺโต เต มาริสายํ อุปฏฺฐิโต ฯ |๒๖.๑๔๒| วตฺตเต จริเม จิตฺเต มมํ สีลํ อนุสฺสรึ เตน กมฺเมน สุกเตน ตาวตึสํ อคญฺฉหํ ฯ |๒๖.๑๔๓| ตึสกฺขตฺตุญฺจ เทวินฺโท เทวรชฺชมการยึ ทิพฺพสุขํ อนุภวึ อจฺฉราหิ ปุรกฺขโต ฯ |๒๖.๑๔๔| ปญฺจสตฺตติกฺขตฺตุญฺจ จกฺกวตฺติ อโหสหํ ปเทสรชฺชํ วิปุลํ คณนาโต อสงฺขยํ ฯ |๒๖.๑๔๕| เทวโลกา จวิตฺวาน สุกฺกมูเลน โจทิโต ปุเร เวสาลิยํ ชาโต มหาสาเล สุอทฺธเก ฯ |๒๖.๑๔๖| วสฺสูปนายิเก กาเล ทิปฺปนฺเต ชินสาสเน มาตา จ เม ปิตา เจว ปญฺจสิกฺขาปทคฺคหุํ ฯ |๒๖.๑๔๗| สห สุตฺวานหํ สีลํ มม สีลํ อนุสฺสรึ เอกาสเน นิสีทิตฺวา อรหตฺตํ อปาปุณึ ฯ |๒๖.๑๔๘| ชาติยา ปญฺจวสฺเสน อรหตฺตํ อปาปุณึ อุปสมฺปาทยิ พุทฺโธ คุณมญฺญาย จกฺขุมา ฯ |๒๖.๑๔๙| ปริปุณฺณานิ โคเปตฺวา ปญฺจสิกฺขาปทานหํ อปริเมยฺเย อิโต กปฺเป วินิปาตํ น คจฺฉหํ ฯ |๒๖.๑๕๐| โสหํ ยสํ อนุภวึ เตสํ สีลาน วาหสา กปฺปโกฏึ ปกิตฺเตนฺโต กิตฺตเย เอกเทสกํ ฯ |๒๖.๑๕๑| ปญฺจสีลานิ โคเปตฺวา ตโย เหตู ลภามหํ ทีฆายุโก มหาโภโค ติกฺขปญฺโญ ภวามิหํ ฯ |๒๖.๑๕๒| ปกิตฺเตนฺเต ๑- จ สพฺเพสํ อธิมตฺตญฺจ โปริสํ ภวาภเว สํสริตฺวา เอเต ฐาเน ลภามหํ ฯ |๒๖.๑๕๓| อปริเมยฺเยสุ สีเลสุ วตฺตนฺตา ชินสาวกา ภเวสุ ยทิ รชฺเชยฺยุํ วิปาโก กีทิโส ภเว ฯ |๒๖.๑๕๔| สุจิณฺณํ เม ปญฺจสีลํ ภตเกน ตปสฺสินา ๒- เตน สีเลนหํ อชฺช โมจยึ ๓- สพฺพพนฺธนา ฯ |๒๖.๑๕๕| อปริเมยฺเย อิโต กปฺเป ปญฺจสีลานิ โคปยึ ทุคฺคตึ นาภิชานามิ ปญฺจสีลานิทํ ผลํ ฯ |๒๖.๑๕๖| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ @เชิงอรรถ: ๑ ม. สงฺกิตฺเตนฺโต ฯ ยุ. ปกิตฺเตนฺโต ฯ ๒ ยุ. วิปสฺสินา ฯ ๓ ยุ. โปฐยึ ฯ อิตฺถํ สุทํ อายสฺมา ปญฺจสีลสมาทานิโย เถโร อิมา คาถาโย อภาสิตฺถาติ ฯ ปญฺจสีลสมาทานิยตฺเถรสฺส อปทานํ สมตฺตํ ฯ