๕. โคสีสนิกเขปกเถราปทาน (๒๙๕)

TIPITAKA Volume 32 : PALI ROMAN Sutta Pitaka Vol 24 : Sutta. Khu. Apa(1) Pañcamaṃ gosīsanikkhepakattherāpadānaṃ (295)

[297] |297.21| Ārāmadvārā nikkhamma gosīsaṃ santhataṃ mayā anubhomi sakaṃ kammaṃ pubbakammassidaṃ phalaṃ. |297.22| Ājāniyā vātajavā sindhavā sīghabāhanā anubhomi sabbametaṃ gosīsassa idaṃ phalaṃ. |297.23| Aho kāraṃ paramakāraṃ sukhette sukataṃ mayā saṅghe katassa kārassa na aññaṃ kalamagghati. |297.24| Catunavute ito kappe yaṃ sīsaṃ santhariṃ ahaṃ duggatiṃ nābhijānāmi santharassa idaṃ phalaṃ. |297.25| Pañcasattatikappamhi supatiṭṭhitanāmako eko āsiṃ mahātejo cakkavatti mahabbalo. |297.26| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā gosīsanikkhepako thero imā gāthāyo abhāsitthāti. Gosīsanikkhepakattherassa apadānaṃ samattaṃ.