๘. สุมนาเวฬิยเถราปทาน (๓๒๘)

|330.64| Vessabhussa bhagavato lokajeṭṭhassa tādino sabbe janā samāgamma mahāpūjaṃ karonti te. |330.65| Sudhāya piṇḍaṃ katvāna āveḷaṃ sumanāyahaṃ sīhāsanassa purato abhiropesahaṃ tadā. |330.66| Sabbe janā samāgamma pekkhanti pupphamuttamaṃ kenidaṃ pūjitaṃ pupphaṃ buddhaseṭṭhassa tādino. |330.67| Tena cittappasādena nimmānaṃ upapajjahaṃ anubhomi 1- sakaṃ kammaṃ pubbe sukatamattano. |330.68| Yaṃ yaṃ yonūpapajjāmi devattaṃ atha mānusaṃ sabbesānaṃ piyo homi pupphapūjāyidaṃ phalaṃ. @Footnote: 1 Ma. anubhosiṃ. |330.69| Nābhijānāmi kāyena vācāya uda cetasā saṃyatānaṃ tapassīnaṃ kataṃ upaṭṭhāhitaṃ mayā. |330.70| Tena sucaritenāhaṃ cittassa paṇidhīhi ca sabbesaṃ pūjito homi anakkosassidaṃ phalaṃ. |330.71| Ekattiṃse ito kappe yaṃ pupphamabhipūjayiṃ duggatiṃ nābhijānāmi buddhapūjāyidaṃ phalaṃ. |330.72| Ito ekādase kappe sahassārosi khattiyo sattaratanasampanno cakkavatti mahabbalo. |330.73| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā sumanāveḷiyo thero imā gāthāyo abhāsitthāti. Sumanāveḷiyattherassa apadānaṃ samattaṃ.