๙. ปุปผฉัตติยเถราปทาน (๓๒๙)

|331.74| Siddhatthassa bhagavato lokajeṭṭhassa tādino saccaṃ pakāsayantassa nibbāpentassa pāṇino. |331.75| Jalajaṃ āharitvāna sattapattaṃ manoramaṃ pupphassa chattaṃ katvāna buddhassa abhiropayiṃ. |331.76| Siddhattho ca lokavidū āhutīnaṃ paṭiggaho bhikkhusaṅghe ṭhito satthā imaṃ 1- gāthaṃ abhāsatha. |331.77| Yo me cittaṃ pasādetvā pupphachattaṃ adhārayi 2- tena cittappasādena duggatiṃ so na gacchati. |331.78| Idaṃ vatvāna sambuddho siddhattho lokanāyako uyyojetvāna parisaṃ vehāsaṃ nabhamuggami. |331.79| Uṭṭhite naradevamhi setacchattaṃpi vuṭṭhahi purato buddhaseṭṭhassa gacchati chattamuttamaṃ. |331.80| Catunavute ito kappe yaṃ chattaṃ abhiropayiṃ duggatiṃ nābhijānāmi pupphachattassidaṃ phalaṃ. |331.81| Catusattatikappamhi aṭṭha jalasikhā ahu sattaratanasampannā cakkavattī mahabbalā. |331.82| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā pupphachattiyo thero imā gāthāyo abhāsitthāti. Pupphachattiyattherassa apadānaṃ samattaṃ.