๙. โสณโกฏิวิสเถราปทาน (๓๘๙)

|๓๙๑.๔๙| วิปสฺสิโน ปาวจเน เอกํ เลณํ มยา กตํ จาตุทฺทิสสฺส สงฺฆสฺส พนฺธุมาราชธานิยา ฯ |๓๙๑.๕๐| ทุสฺเสหิ ภูมึ เลณสฺส สนฺถริตฺวา ปริจฺจชึ อุทคฺคจิตฺโต สุมโน อกาสึ ปณิธึ ตทา ฯ |๓๙๑.๕๑| อาราเธยฺยํ สมฺพุทฺธํ ปพฺพชฺชญฺจ ลเภยฺยหํ อนุตฺตรญฺจ นิพฺพานํ ผุเสยฺยํ สนฺติมุตฺตมํ ฯ |๓๙๑.๕๒| เตเนว สุกฺกมูเลน กปฺเป นวุติ สํสรึ เทวภูโต มนุสฺโส จ กตปุญฺโญ วิโรจหํ ฯ |๓๙๑.๕๓| ตโต กมฺมาวเสเสน อิธ ปจฺฉิมเก ภเว จมฺปายํ อคฺคเสฏฺฐิสฺส ชาโตมฺหิ เอกปุตฺตโก ฯ |๓๙๑.๕๔| ชาตมตฺตสฺส เม สุตฺวา ปิตุฉนฺโท อยํ อหุ ททามหํ กุมารสฺส วีสโกฏี อนูนกา ฯ |๓๙๑.๕๕| จตุรงฺคุลา จ เม โลมา ชาตา ปาทตเล อุโภ สุขุมา มุทุสมฺผสฺสา ตุลาปิจุสมา สุภา ฯ |๓๙๑.๕๖| อตีตา นวุติ กปฺปา อยํ เอโก จ อุตฺตรึ นาภิชานามิ นิกฺขิตฺเต ปาเท ภุมฺเม ๑- อสนฺถเต ฯ |๓๙๑.๕๗| อาราธิโต เม สมฺพุทฺโธ ปพฺพชึ อนคาริยํ อรหตฺตญฺจ เม ปตฺตํ สีติภูโตมฺหิ นิพฺพุโต ฯ |๓๙๑.๕๘| อคฺคารทฺธวิริยานํ นิทฺทิฏฺโฐ สพฺพทสฺสินา ขีณาสโว ๒- จ อรหา ฉฬภิญฺโญ มหิทฺธิโก ฯ |๓๙๑.๕๙| เอกนวุเต อิโต กปฺเป ยํ ทานมททึ ตทา ทุคฺคตึ นาภิชานามิ เลณทานสฺสิทํ ผลํ ฯ |๓๙๑.๖๐| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๓๙๑.๖๑| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๓๙๑.๖๒| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนํ ฯ @เชิงอรรถ: ๑ ม. ภุมฺยา ฯ ๒ ม. ขีณาสโวมฺหิ อรหา ฯ |๓๙๑.๖๓| เถโร ๑- โกฏิวิโส โสโณ ภิกฺขุสงฺฆสฺส อคฺคโต ปญฺหํ ปุฏฺโฐ วิยากาสิ อโนตตฺตมหาสเรติ ฯ อิตฺถํ สุทํ อายสฺมา โสโณ โกฏิวิโส เถโร อิมา คาถาโย อภาสิตฺถาติ ฯ โสณโกฏิวิสตฺเถรสฺส อปทานํ สมตฺตํ ฯ