๗. ปัญจทีปกเถราปทาน (๕๗)

|59.50| Padumuttarabuddhassa sabbabhūtānukampino susaddahitvā 1- saddhamme ujudiṭṭhi ahosahaṃ. |59.51| Padīpadānapādāsiṃ parivāritvāna bodhiyaṃ saddahanto padīpāni akariṃ tāvadevahaṃ. |59.52| Yaṃ yaṃ yonūpapajjāmi devattaṃ atha mānusaṃ ākāse ukkaṃ dhārenti dīpadānassidaṃ phalaṃ. |59.53| Tirokuṭaṃ 2- tiroselaṃ samatiggayha pabbataṃ samantā yojanasataṃ dassanaṃ anubhomahaṃ. |59.54| Tena kammāvasesena pattomhi āsavakkhayaṃ dhāremi antimaṃ dehaṃ dipadindassa sāsane. |59.55| Catuttiṃse kappasate satacakkhusanāmakā rājāhesuṃ mahātejā cakkavattī mahabbalā. @Footnote: 1 Ma. saddahitvāna Yu. susaṇṭhahitvā. 2 Ma. Yu. tirokuṭaṭaṃ. |59.56| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā pañcadīpako thero imā gāthāyo abhāsitthāti. Pañcadīpakattherassa apadānaṃ samattaṃ.