๑. สกจิตตนิยเถราปทาน (๖๑)

[๖๓] |๖๓.๑| ปวนํ กานนํ ทิสฺวา อปฺปสทฺทํ อนาวิลํ อิสีนํ อนุจิณฺณํว อาหุตีนํ ปฏิคฺคหํ ฯ |๖๓.๒| ถูปํ กตฺวาน เวฬินํ ๑- นานาปุปฺผํ สโมกิรึ สมฺมุขา วิย สมฺพุทฺธํ นิมฺมิตํ อภิวนฺทหํ ฯ |๖๓.๓| สตฺตรตนสมฺปนฺโน ราชา รฏฺฐสฺมิ อิสฺสโร สกกมฺมาภิรทฺโธหํ ปุปฺผปูชายิทํ ผลํ ฯ |๖๓.๔| เอกนวุเต อิโต กปฺเป ยํ ปุปฺผมภิโรปยึ ทุคฺคตึ นาภิชานามิ พุทฺธปูชายิทํ ๒- ผลํ ฯ |๖๓.๕| อสีติกปฺเปนนฺตยโส จกฺกวตฺติ อโหสหํ สตฺตรตนสมฺปนฺโน จตุทีปมฺหิ อิสฺสโร ฯ |๖๓.๖| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา สกจิตฺตนิโย ๓- เถโร อิมา คาถาโย อภาสิตฺถาติ ฯ สกจิตฺตนิยตฺเถรสฺส อปทานํ สมตฺตํ ฯ