TIPITAKA Volume 32 : PALI ROMAN Sutta Pitaka Vol 24 : Sutta. Khu. Apa(1) Aṭṭhamaṃ maggasaññakattherāpadānaṃ (118)

[120] |120.66| Padumuttarabuddhassa sāvakā vanacārino vippanaṭṭhā brahāraññe andhāva anusuyyare. |120.67| Anussaritvā sambuddhaṃ padumuttaranāyakaṃ tassa te munino puttā vippanaṭṭhā mahāvane. |120.68| Bhavanā oruhitvāna āgamiṃ bhikkhusantike tesaṃ maggañca ācikkhiṃ bhojanañca adāsahaṃ. |120.69| Tena kammena dipadinda lokajeṭṭha narāsabha jātiyā sattavassena arahattaṃ apāpuṇiṃ. |120.70| Sacakkhu nāma nāmena dvādasa cakkavattino sattaratanasampannā pañcakappasate ito. |120.71| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā maggasaññako thero imā gāthāyo abhāsitthāti. Maggasaññakattherassa apadānaṃ samattaṃ.