๘. โฆสสัญญกเถราปทาน

[๑๐๘] |๑๐๘.๔๔| มิคลุทฺโธ ปุเร อาสึ อรญฺเญ วิวเน อหํ อทฺทสํ วิรชํ พุทฺธํ เทวสงฺฆปุรกฺขตํ ฯ |๑๐๘.๔๕| จตุสจฺจํ ปกาเสนฺตํ เทเสนฺตํ อมตํปทํ อสฺโสสึ มธุรํ ธมฺมํ สิขิโน โลกพนฺธุโน ฯ |๑๐๘.๔๖| โฆเส จิตฺตํ ปสาเทสึ อสมปฺปฏิปุคฺคเล ๑- ตตฺถ จิตฺตํ ปสาเทตฺวา อุตฺตรึ ทุตฺตรํ ภวํ ฯ |๑๐๘.๔๗| เอกตฺตึเส อิโต กปฺเป ยํ สญฺญมลภึ ตทา ทุคฺคตึ นาภิชานามิ โฆสสญฺญายิทํ ผลํ ฯ |๑๐๘.๔๘| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๑๐๘.๔๙| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๑๐๘.๕๐| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา โฆสสญฺญโก เถโร อิมา คาถาโย อภาสิตฺถาติ ฯ โฆสสญฺญกตฺเถรสฺส อปทานํ สมตฺตํ ฯ @เชิงอรรถ: ๑ ยุ. อสมปฺปฏิปุคฺคลํ ฯ