๙. อามัณฑผลทายกเถราปทาน

TIPITAKA Volume 33 : PALI ROMAN Sutta Pitaka Vol 25 : Sutta. Khu. Apa(2) Buddhavaṃso Cariyāpiṭakaṃ Navamaṃ āmaṇḍaphaladāyakattherāpadānaṃ (529)

[119] |119.74| Padumuttaro nāma jino sabbadhammāna pāragū vuṭṭhahitvā samādhimhā caṅkami lokanāyako. |119.75| Khāribhāraṃ gahetvāna āharanto phalaṃ tadā addasaṃ virajaṃ buddhaṃ caṅkamantaṃ mahāmuniṃ. |119.76| Pasannacitto sumano sire katvāna añjaliṃ sambuddhaṃ abhivādetvā āmaṇḍamadadiṃ phalaṃ. |119.77| Satasahasse ito kappe yaṃ phalaṃ adadiṃ tadā duggatiṃ nābhijānāmi āmaṇḍassa idaṃ phalaṃ. |119.78| Kilesā jhāpitā mayhaṃ bhavā sabbe samūhatā nāgova bandhanaṃ chetvā vīharāmi anāsavo. |119.79| Svāgataṃ vata me āsi mama buddhassa santike tisso vijjā anuppattā kataṃ buddhassa sāsanaṃ. |119.80| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā āmaṇḍaphaladāyako thero imā gāthāyo abhāsitthāti. Āmaṇḍaphaladāyakattherassa apadānaṃ samattaṃ.