๑๕. ธรรมทัสสีพุทธวงศ์

[๑๖] |๑๖.๑| ตตฺเถว มณฺฑกปฺปมฺหิ ธมฺมทสฺสี มหายโส ตมนฺธการํ วิธมิตฺวา อติโรจติ สเทวเก ฯ |๑๖.๒| ตสฺสาปิ อตุลเตชสฺส ธมฺมจกฺกปฺปวตฺตเน โกฏิสตสหสฺสานํ ปฐมาภิสมโย อหุ ฯ |๑๖.๓| ยทา พุทฺโธ ธมฺมทสฺสี วิเนสิ สญฺชยํ อิสี ตทา นวุติโกฏีนํ ทุติยาภิสมโย อหุ ฯ |๑๖.๔| ยทา สกฺโก อุปคญฺฉิ สปริโส วินายกํ ตทา อสีติโกฏีนํ ตติยาภิสมโย อหุ ฯ |๑๖.๕| ตสฺสาปิ เทวเทวสฺส สนฺนิปาตา ตโย อาสุํ ๑- ขีณาสวานํ วิมลานํ สนฺตจิตฺตาน ตาทินํ ฯ |๑๖.๖| ยทา พุทฺโธ ธมฺมทสฺสี สรเณ วสฺสํ อุปาคมิ ตทา โกฏิสหสฺสานํ ๒- ปฐโม อาสิ สมาคโม ฯ |๑๖.๗| ปุนาปรํ ยทา พุทฺโธ เทวโต เอติ ๓- มานุสํ ตทาปิ สตโกฏีนํ ทุติโย อาสิ สมาคโม ฯ @เชิงอรรถ: ๑ ม. ยุ. อหุํ ฯ ๒ โป. ม. โกฏิสตสหสฺสานํ ฯ ๓ ยุ. .. เอหิ มานุเส ฯ |๑๖.๘| ปุนาปรํ ยทา พุทฺโธ ปกาเสสิ ธุเต คุเณ ตทา อสีติโกฏินํ ตติโย อาสิ สมาคโม ฯ |๑๖.๙| อหนฺเตน สมเยน สกฺโก อาสึ ปุรินฺทโท ทิพฺพคนฺเธน มาเลน ตุริเยน อภิปูชยึ ฯ |๑๖.๑๐| โสปิ มํ ตทา ๑- พฺยากาสิ เทวมชฺเฌ นิสีทิย อฏฺฐารสกปฺปสเต อยํ พุทฺโธ ภวิสฺสติ ฯ |๑๖.๑๑| อหุ กปิลวฺหยา รมฺมา นิกฺขมิตฺวา ตถาคโต ปธานํ ปทหิตฺวาน กตฺวา ทุกฺกรการิกํ ฯ |๑๖.๑๒| อชปาลรุกฺขมูลสฺมึ นิสีทิตฺวา ตถาคโต ตตฺถ ปายาสํ ปคฺคยฺห เนรญฺชรมุเปหิติ ฯ |๑๖.๑๓| เนรญฺชราย ตีรมฺหิ ปายาสํ อทิ โส ชิโน ปฏิยตฺตวรมคฺเคน โพธิมูลมฺหิ เอหิติ ฯ |๑๖.๑๔| ตโต ปทกฺขิณํ กตฺวา โพธิมณฺฑํ อนุตฺตรํ อสฺสตฺถรุกฺขมูลมฺหิ พุชฺฌิสฺสติ มหายโส ฯ |๑๖.๑๕| อิมสฺส ชนิกา มาตา มายา นาม ภวิสฺสติ ปิตา สุทฺโธทโน นาม อยํ เหสฺสติ โคตโม ฯ |๑๖.๑๖| โกลิโต อุปติสฺโส จ อคฺคา เหสฺสนฺติ สาวกา อนาสวา วีตราคา สนฺตจิตฺตา สมาหิตา |๑๖.๑๗| อานนฺโท นามุปฏฺฐาโก อุปฏฺฐิสฺสติ มํ ชินํ ฯ @เชิงอรรถ: ๑ โป. ม. ยุ. พุทฺโธ ฯ |๑๖.๑๘| เขมา อุปฺปลวณฺณา จ อคฺคา เหสฺสนฺติ สาวิกา อนาสวา วีตราคา สนฺตจิตฺตา สมาหิตา ฯ |๑๖.๑๙| โพธิ ตสฺส ภควโต อสฺสตฺโถติ ปวุจฺจติ จิตฺโต จ หตฺถาฬวโก อคฺคา เหสฺสนฺตุปฏฺฐกา ฯ |๑๖.๒๐| นนฺทมาตา จ อุตฺตรา อคฺคา เหสฺสนฺตุปฏฺฐิกา อายุ วสฺสสตํ ตสฺส โคตมสฺส ยสสฺสิโน ฯ |๑๖.๒๑| อิทํ สุตฺวาน วจนํ อสมสฺส มเหสิโน อาโมทิตา นรมรู พุทฺธวีชงฺกุโร อยํ ฯ |๑๖.๒๒| อุกฺกุฏฺฐิสทฺทา วตฺตนฺติ อปฺโผเฏนฺติ หสนฺติ จ กตญฺชลี นมสฺสนฺติ ทสสหสฺสี สเทวกา ฯ |๑๖.๒๓| ยทิมสฺส โลกนาถสฺส วิรชฺฌิสฺสาม สาสนํ อนาคตมฺหิ อทฺธาเน เหสฺสาม สมฺมุขา อิมํ ฯ |๑๖.๒๔| ยถา มนุสฺสา นทึ ตรนฺตา ปฏิติตฺถํ วิรชฺฌิย เหฏฺฐาติตฺถํ คเหตฺวาน อุตฺตรนฺติ มหานทึ ฯ |๑๖.๒๕| เอวเมว มยํ สพฺเพ ยทิ มุญฺจามิมํ ชินํ อนาคตมฺหิ อทฺธาเน เหสฺสาม สมฺมุขา อิมํ ฯ |๑๖.๒๖| ตสฺสาปิ วจนํ สุตฺวา ภิยฺโย จิตฺตํ ปสาทยึ อุตฺตรึ วตฺตมธิฏฺฐาสึ ทสปารมิปูริยา ฯ |๑๖.๒๗| สรณํ นาม นครํ สรโณ นาม ขตฺติโย สุนนฺทา นาม ชนิกา ธมฺมทสฺสิสฺส สตฺถุโน ฯ |๑๖.๒๘| อฏฺฐวสฺสสหสฺสานิ อคารํ อชฺฌาวสิ โส อรโช วิรโช สุทสฺสโน ตโย ปาสาทมุตฺตมา ฯ |๑๖.๒๙| จตฺตาฬีสหสฺสานิ ๑- นาริโย สมลงฺกตา วิจิโกลี ๒- นาม นารี อตฺรโช ปุญฺญวฑฺฒโน ฯ |๑๖.๓๐| นิมิตฺเต จตุโร ทิสฺวา ปาสาเทนาภินิกฺขมิ สตฺตาหํ ปธานจารํ อจริ ปุริสุตฺตโม ฯ |๑๖.๓๑| พฺรหฺมุนา ยาจิโต สนฺโต ธมฺมทสฺสี นราสโภ วตฺตจกฺโก มหาวีโร มิคทาเย นรุตฺตโม ฯ |๑๖.๓๒| ปทุโม ปุสฺสเทโว ๓- จ อเหสุํ อคฺคสาวกา สุทตฺโต นามุปฏฺฐาโก ธมฺมทสฺสิสฺส สตฺถุโน ฯ |๑๖.๓๓| เขมา จ สจฺจนามา จ อเหสุํ อคฺคสาวิกา โพธิ ตสฺส ภควโต ติมฺพชาโลติ ๔- วุจฺจติ ฯ |๑๖.๓๔| สุภทฺโท กฏิสฺสโห เจว อเหสุํ อคฺคุปฏฺฐกา สาฬิสา ๕- จ กฬิสฺสา จ อเหสุํ อคฺคุปฏฺฐิกา ฯ |๑๖.๓๕| โสปิ พุทฺโธ อสมสโม อสีติหตฺถมุคฺคโต อติโรจติ เตเชน ทสสหสฺสมฺหิ ธาตุยา ฯ |๑๖.๓๖| สุผุลฺโล สาลราชาว วิชฺชุว คคเน ยถา มชฺฌนฺติเกว สุริโย เอวํ โส อุปโสภถ ๖- ฯ |๑๖.๓๗| ตสฺสาปิ อตุลเตชสฺส สมกํ อาสิ ชีวิตํ วสฺสสตสหสฺสานิ โลเก อฏฺฐาสิ จกฺขุมา ฯ @เชิงอรรถ: ๑ ม. ยุ. ติจตฺตาฬีสสหสฺสานิ ฯ ๒ ยุ. วิจิโตฬี ฯ ๓ ม. ยุ. ผุสฺสเทโว ฯ @ ๔ ม. ยุ. พิมฺพชาโล ฯ ๕ ม. สาฬิยา จ กฬิยา จ ฯ ยุ. สาฬิยา จ วฬิยา จ ฯ @ ๖ ยุ. อุปโสภิตฺถ ฯ |๑๖.๓๘| โอภาสํ ทสฺสยิตฺวาน วิมลํ กตฺวาน สาสนํ จวิ ๑- จนฺโทว คคเน นิพฺพุโต โส สสาวโกติ ฯ |๑๖.๓๙| ธมฺมทสฺสี มหาวีโร เกสารามมฺหิ ๒- นิพฺพุโต ตสฺเสว ๓- โส ถูปวโร ตีณิ โยชนมุคฺคโตติ ฯ ธมฺมทสฺสิพุทฺธวํโส ปณฺณรสโม ฯ