๑. ชคติทายกเถราปทาน

TIPITAKA Volume 33 : PALI ROMAN Sutta Pitaka Vol 25 : Sutta. Khu. Apa(2) Buddhavaṃso Cariyāpiṭakaṃ Chacattāḷīso jagativaggo paṭhamaṃ jagatidāyakattherāpadānaṃ (451)

[41] |41.1| Dhammadassissa munino bodhiyā pādaputtame pasannacitto sumano jagatiṃ kārayiṃ ahaṃ. |41.2| Darito pabbatāto vā rukkhato patito ahaṃ cuto patiṭṭhaṃ vindāmi 1- jagatiyā idaṃ phalaṃ. |41.3| Na me corā vihesanti 2- nātimaññanti khattiyā sabbāmittetikkamāmi jagatiyā idaṃ phalaṃ. |41.4| Yaṃ yaṃ yonūpapajjāmi devattaṃ atha mānusaṃ sabbattha pūjito homi jagatiyā idaṃ phalaṃ. |41.5| Aṭṭhārase kappasate jagatiṃ kārayiṃ ahaṃ duggatiṃ nābhijānāmi jagatidānassidaṃ phalaṃ. |41.6| Kilesā jhāpitā mayhaṃ bhavā sabbe samūhatā nāgova bandhanaṃ chetvā viharāmi anāsavo. |41.7| Svāgataṃ vata me āsi mama buddhassa santike tisso vijjā anuppattā kataṃ buddhassa sāsanaṃ. |41.8| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. @Footnote: 1 Yu. labhāmi. 2 Yu. pasahanti. Itthaṃ sudaṃ āyasmā jagatidāyako thero imā gāthāyo abhāsitthāti. Jagatidāyakattherassa apadānaṃ samattaṃ.