[๙] |๙.๑| อโนมทสฺสิสฺส อปเรน สมฺพุทฺโธ ทิปทุตฺตโม ปทุโม นาม นาเมน อสโม อปฺปฏิปุคฺคโล ฯ |๙.๒| ตสฺสาปิ อสมํ สีลํ สมาธิปิ อนนฺตโก ๑- อสงฺเขยฺยํ ญาณวรํ วิมุตฺติปิ อนูปมา ฯ |๙.๓| ตสฺสาปิ อตุลเตชสฺส ธมฺมจกฺกปฺปวตฺตเน อภิสมยา ตโย อาสุํ มหาตม ปวาหนา ฯ |๙.๔| ปฐมาภิสมเย พุทฺโธ โกฏิสตมโพธยิ ทุติยาภิสมเย ธีโร นวุติโกฏิมโพธยิ ฯ |๙.๕| ยทา จ ปทุโม พุทฺโธ โอวทิ สกมตฺรชํ ตทา อสีติโกฏีนํ ตติยาภิสมโย อหุ ฯ |๙.๖| สนฺนิปาตา ตโย อาสุํ ปทุมสฺส มเหสิโน โกฏิ สตสหสฺสานํ ปฐโม อาสิ สมาคโม ฯ |๙.๗| กฐินตฺถารสมเย อุปฺปนฺเน กฐินจีวเร ธมฺมเสนาปติตฺถาย ๒- ภิกฺขู สิพฺพึสุ จีวรํ ฯ |๙.๘| ตทา เต วิมลา ภิกฺขู ฉฬภิญฺญา มหิทฺธิกา ตีณิ สตสหสฺสานิ สมึสุ อปราชิตา ฯ |๙.๙| ปุนาปรํ โส นรวุสโภ ๓- ปวเน วาสํ อุปาคมิ ตทา สมาคโม อาสิ ทฺวินฺนํ สตสหสฺสานํ ฯ |๙.๑๐| อหนฺเตน สมเยน สีโห อาสึ มิคาภิภู @เชิงอรรถ: ๑ ยุ. อนนฺตกา ฯ ๒ ยุ. ... ปตตฺถาย ฯ ๓ ม. ยุ. นราสโภ ฯ วิเวกมนุพฺรูหนฺตํ ปวเน อทฺทสํ ชินํ ฯ |๙.๑๑| วนฺทิตฺวา สิรสา ปาเท กตฺวาน ตํ ปทกฺขิณํ ติกฺขตฺตุํ อภินาทิตฺวา ๑- สตฺตาหํ ชินมุปฏฺฐหึ ฯ |๙.๑๒| สตฺตาหํ วรสมาปตฺติยา วุฏฺฐหิตฺวา ตถาคโต มนสา จินฺตยิตฺวาน โกฏิภิกฺขู สมานยิ ฯ |๙.๑๓| ตทาปิ โส มหาวีโร เตสํ มชฺเฌ วิยากริ อปริเมยฺเย อิโต กปฺเป อยํ พุทฺโธ ภวิสฺสติ ฯ |๙.๑๔| อหุ กปิลวฺหยา รมฺมา นิกฺขมิตฺวา ตถาคโต ปธานํ ปทหิตฺวาน กตฺวา ทุกฺกรการิกํ ฯ |๙.๑๕| อชปาลรุกฺขมูลสฺมึ นิสีทิตฺวา ตถาคโต ตตฺถ ปายาสํ ปคฺคยฺห เนรญฺชรมุเปหิติ ฯ |๙.๑๖| เนรญฺชราย ตีรมฺหิ ปายาสํ อทิ โส ชิโน ปฏิยตฺต วรมคฺเคน โพธิมูลมฺหิ เอหิติ ฯ |๙.๑๗| ตโต ปทกฺขิณํ กตฺวา โพธิมณฺฑํ อนุตฺตรํ อสฺสตฺถรุกฺขมูลมฺหิ พุชฺฌิสฺสติ มหายโส ฯ |๙.๑๘| อิมสฺส ชนิกา มาตา มายา นาม ภวิสฺสติ ปิตา สุทฺโธทโน นาม อยํ เหสฺสติ โคตโม ฯ |๙.๑๙| อนาสวา วีตราคา สนฺตจิตฺตา สมาหิตา โกลิโต อุปติสฺโส จ อคฺคา เหสฺสนฺติ สาวกา อานนฺโท นามุปฏฺฐาโก อุปฏฺฐิสฺสติมํ ชินํ ฯ @เชิงอรรถ: ๑ ยุ. อภินนฺทิตฺวา ฯ |๙.๒๐| เขมา อุปฺปลวณฺณา จ อคฺคา เหสฺสนฺติ สาวิกา อนาสวา วีตราคา สนฺตจิตฺตา สมาหิตา ฯ |๙.๒๑| โพธิ ตสฺส ภควโต อสฺสตฺโถติ ปวุจฺจติ จิตฺโต จ หตฺถาฬวโก อคฺคา เหสฺสนฺตุปฏฺฐกา ฯ |๙.๒๒| นนฺทมาตา จ อุตฺตรา อคฺคา เหสฺสนฺตุปฏฺฐิกา อายุ วสฺสสตํ ตสฺส โคตมสฺส ยสสฺสิโน ฯ |๙.๒๓| อิทํ สุตฺวาน วจนํ อสมสฺส มเหสิโน อาโมทิตา นรมรู พุทฺธวีชงฺกุโร อยํ ฯ |๙.๒๔| อุกฺกุฏฺฐิสทฺทา วตฺตนฺติ อปฺโผเฏนฺติ หสนฺติ จ กตญฺชลี นมสฺสนฺติ ทสสหสฺสี สเทวกา ฯ |๙.๒๕| ยทิมสฺส โลกนาถสฺส วิรชฺฌิสฺสาม สาสนํ อนาคตมฺหิ อทฺธาเน เหสฺสาม สมฺมุขา อิมํ ฯ |๙.๒๖| ยถา มนุสฺสา นทึ ตรนฺตา ปฏิติตฺถํ วิรชฺฌิย เหฏฺฐา ติตฺถํ คเหตฺวาน อุตฺตรนฺติ มหานทึ ฯ |๙.๒๗| เอวเมว มยํ สพฺเพ ยทิ มุญฺจามิมํ ชินํ อนาคตมฺหิ อทฺธาเน เหสฺสาม สมฺมุขา อิมํ ฯ |๙.๒๘| ตสฺสาปิ วจนํ สุตฺวา ภิยฺโย จิตฺตํ ปสาทยึ อุตฺตรึ วตฺตมธิฏฺฐาสึ ทสปารมิปูริยา ฯ |๙.๒๙| จมฺปกํ นาม นครํ อสโม นาม ขตฺติโย อสมา นาม ชนิกา ปทุมสฺส มเหสิโน ฯ |๙.๓๐| ทสวสฺสสหสฺสานิ อคารํ อชฺฌาวสิ โส นนฺโท วสุ ยสตฺตโร ๑- ตโย ปาสาท มุตฺตมา ฯ |๙.๓๑| เตตฺตึส